Tommy nanghagit

Makigpustaanay si Mayor Tomas Osmeña niadtong mga tawo nga nagtuong lupig ang iyang ka-tandem pagkabise mayor nga si Mary Ann delos Santos sa kaatbang niini nga si kanhi mayor Mike Rama.

Si Rama ug Delos Santos pareho nga nagpapili pagkabise mayor sa dakbayan sa Sugbo sa eleksiyon karong Mayo 13.

Ang uban nagtuo nga lig-on si Delos Santos sa north district, apan sa south district kuno medyo  hinay kay taga didto man si Rama.

Apan matud ni Osmeña nga bisan sa south district, lig-on gihapon ang iyang ka-tandem, ug mao nga nanghagit siya’g pustaanay.

Sa akong paniid, dili angay’ng mokumpiyansa si Rama kay abtik usab kaayong mangampanya si Delos Santos, ug kadaghanan sa mga kapitan ilang kaalyado.

Ikaduha, walay isyu si Delos Santos gawas niadtong pasangil nga nakakuwarta kuno sa mga scrap nga puthaw sa gibungkag nga CCMC, pero daghan ang nasayod nga dili man kadto tinuod.

Matud ni Osmeña nga kon tinuod pa, gikiha na unta si Delos Santos sa Ombudsman.

* * *

Naghisgot man gyud ta og Ombudsman, uy nanggawas lagi karon sa social media kadtong report sa mga TV network sa Manila kabahin sa pagkakonbikto ni kanhi gobernador Gwen Garcia sa kaso nga naglambigit pagpalit og P99 milyones nga yuta sa Tinaan, Naga nga naa sa dagat.

Tan-aw nako, mao kini ang makadaot sa iyang tinguha nga magpapili pag-usab pagka gobernador sa  Sugbo, kay ang iyang kaatbang nga si Vice Governor Agnes Magpale, wala man gyud malambigit og kaso.

Oki ra man unta kadto kon napasakaan og kaso basta wala lang makonbikto.

Nag-atbang karon pagpapili pagka gobernador sila si Gwen ug Magpale.

Ambot kon unsaon kaha pagpasabot ni Gwen ang katawhan atol sa iyang mga pagpangampanya. Naa diha makabentaha si Magpale.

* * *

Giingnan ko sa amigo nakong reporter nga pipila ka adlaw gikan karon, mopahibalo na gyud sa publiko ang inilang negosyante sa Mandaue nga si Norberto Quisumbing nga dili siya mosuporta sa iyang apo nga si Luigi Quisumbing, ug adto siya mosuporta kang Jonas Cortes.

Matingala kita no kon nganong si Mr. Q adto man hinuon mosuporta kang Jonas nga dili iyang paryente, ug yam-iran lang ang iyang apo?

Sigurado ko nga inig pahibalo ni Mr. NQ sa iyang pagsuporta ni Jonas Cortes, ipasabot niya ang iyang rason.

Tan-aw nako, kining isyuha makadaut sab ning Luigi nga gustong masublian sa iyang katungdanan. Bisan ang mga reporter sa Mandaue hinuon mitug-an nako nga mas kinaham sa mga masa si Jonas kay ni Luigi nga panagsa ra gyud mosuroy sa kabarangayan.