Malisud man ang panahon

Apan siya malaumon sa gihapon. Kini ang gisulti sa akong nakaila nga inahan. Biniyaan sa bana ug gipasagdan nga maoy modumala sa ilang lisud nga pamilya.

Kini kay nakita man niya ang rason sa iyang pagpakabuhi. Ang rason mao man ang iyang mga anak nga kaniya nagsalig.

Bitaw sa kinabuhi natong mga tawo usahay nahimo kitang mapasagaron sa panahon sa kaayohan ug panahon sa kadaghan.

Ug kun ang kalisud na gani ang moabot bation nato dako uyamot ang pagbagulbol kun nganong sa kadaghang tawo kita man gyud ang napili aron paantuson.

Ang tanan mahimong mawala ug mahugno labina kun wala na nato Makita ang kahulogan sa atong kinabuhi. Apan bisan pa man kun sa mga panahon sa kahagip-ot ug kun naa lamang ang kahulogan sa atong pagpakabuhi ang tanan ato ra gyung madala ug masinati.

Ning atong panahon karon daghan ang nawad-an og kahulogan mismo sa ilang kinabuhi.

Buot nilang wagtangon ang tanan kay alang nila malisud na gyud kaayo ang pagpunay og ginhawa kun ugaling ang maong pagginhawa pinasikad lamang sa tinguha nga mokaon katulo sa usa ka adlaw apan nahikalimot sa paghatag og bulok sa matag gutlo nga molabay.

Isyu kini sa paghimo sa kaugalingon nga relevant sa gihapon taliwala sa boring nga kinabuhi ug boring nga mga tawo. Ang tanan nagsukad ra gyud sa pagpili segun sa bisan unsang makaayo ug mapahatag kanato og tinud-anay nga kalipay.

Sa dihang gipangutana ko ang usa sa mga batan-on panahon sa recollection: “Kun may motanyag kanimo og trabaho ug 50 mil ang imong sweldo matag buwan apan di ka malipayon ug nagtrabaho ka nga may 20 mil ang matag buwan apan nalipay ka asa man ang imong pilion?”

Ang gipangutana nipakita sa iyang kahamtong sa iyang pagpili sa mas menos nga sweldo apan nalipay siya kaysa sweldo nga dako apan wala siya malipay.

Butang nga nakaingon ko nga dili diay himoong rason ang kalisud aron mokapit lang kita sa patalim aron lamang mabuhi.

Mahinungdanon ra diay sa gihapon ang kalipay ug kahulogan diha sa atong kinabuhi ug kini dili mahimong mabayran og salapi.

Kay mas mahinungdanon ang panahon nga makahuloganon kay bahandi nga molabay lamang ingon nga tubig.