EDITORYAL - Plataporma di lang porma

Ug nagsugod na gyud og kumbate sa kampanya ang mga lokal nga mga kandidato kagahapon sa tinguhang mahatagan og mandato sa katawhan aron mangulo isip elected officials alang sa umaabot nga midterm elections sa Mayo.

Sa samang higayon, magsugod na sab sa mga botante sa pagkutaw sa ilang mga hunahuna ug pagbinayloay og mga opinyon ug komentaryo bahin sa tagsatagsa ka mga kandidato diha sa ilang lokalidad.

Dunay dili maayong pagsaway sa kinaiya sa mga Pilipino. Dali rang makalimot ug dali ra sab ilaron sa mga politiko. Tingali tinuod kini nga salawayong kinaiya sa mga botante dinhi sa Pilipinas tungod kay daghan man gihapong mga walay ayo nga mga elected officials karong terminoha.

Karon, mao gihapong mga politikoha ang nanagan ug nagpabaga gihapon sa ilang mga nawong nga mangampanya aron masublian. Kun dunay mga walay ayo, aduna man say mga pipila ka lugas nga mapili kay tarong.

Angay nga panid-an sa mga botante, kaning mga kandidato nga sabaan ug kusog mangdaot sa ilang mga kaatbang ug kadtong mga kandidato hilom ug dili makamaong molabtik sa mga kaatbang panahon sa kampanya.

Lakip sa angay bantayan ug gani dili na maayong botaran pag-usab kadtong mga politikong abusado sa gahom, kusog moaswat sa kaugalingong bangko o kadtong moingon nga “ako, ako,ug ako lamang” matag higayon nga moatubang sa mga botante.

Sila kadtong mga politikong sobra kadako ang salig sa kaugalingon bisan og illegal na ang gibuhat. Nagpadayon kining mga klaseha sa mga politiko tungod gihapon sa mga iresponsableng mga botante nga nagbotar kanila.

Dunay mga incumbent officials nga migamit sa posisyon aron ipiton ang mga naa sa oposisyon ug mogawas nga sila maoy husto pinaagi sa pagbali-bali sa mga estorya.

Unta karong panahon sa kampanya sa lokal nga mga kandidato mas mahimong makutikutihon ang mga tawo ug di magpailad sa pangalan lang sa kandidato.

Pangitaan gyud unta og maayong plataporma ug dili lang paporma.