Usa ka pamilyahan sa island barangay sa Pangan-an Dakbayan sa Lapu-Lapu ang nangahilo sa isdang Buriring o gitawag sa uban nga Tikong ug Butete o sa ininglis pa Puffer fish.
Nakalas gyud ang singko anyos nga anak samtang nalandig sa Vicente Sotto Memorial Medical Center ang laing lima ka mga bata nga nagpangidaton og dos anyos ngadto na sa dose anyos human gipangsakitan sa tiyan, nagsuka ug nangalipong human makakaon sa sud-an nga Buriring.
Lakip gani sa nangalanag ang mga ginikanan apan wala ra magrabehan hinungdan nga wala nalang sila magpa-admit kay wala nay makaatiman sa mga bata, ang inahan maoy nagbantay sa iyang mga anak sa hospital samtang ang amahan maoy nag-asikaso sa haya sa namatay niyang anak didto sa isla.
Sumala sa inahan nga kanunay na silang gasud-an og tikong, gani mao kini ilang kinaham kay lami man usab ug kahibawo usab siya molimpyo niini maong wala sila magdahum nga mangahilo niini.
Gani human makaka-on sa ilang pamahaw naligo pa kuno sa dagat ang singko anyos nga anak apan human sa pito ka oras nagmulo na nga sakit ang tiyan ug nagsuka.
Wala dayon nila dad-a sa health center hinungdan nga didto na kini sa ilang balay nakabsan sa kinabuhi, samtang ang ubang mga bata lakip na ang inahan ug amahan mibati na usab sa pagpanakit sa tiyan ug pagsuka.
Unang gidala sila sa district hospital sa isla sa Olango, dayon gidala sa VSMMC.
Anaa na sa luwas nga kahimtang ang mga bata apan giobserbahan pa sila sa mga doktor tungod sa posibleng komplikasyon nga mamugna sa hilo sa buriring.
Apan gisusi pa sa mga medical expert kun Buriring ba gyud ang nakaigo sa naasoyng pamilya tungod kay kun hilo pa sa isda, layo ra kuno ang tres minutos mamahimong mamatay na ang makakaon niini.
Ang Buriring adunay titrodotoxin nga maoy mopatay sa makakaon niini apan milanat pa man og hataas nga panahon ayha nag manifest ang gituohang poisoning.
Posibleng yanong food poison lang ang nahitabo gikan sa uban nga mga pagkaon ang hinungdan.
Dili kini ang unang higayon nga adunay nangahilo sa Buriring kay naa man sab sa laing mga dapit, apan daghan gihapong mga tawo ang mangaon sa maong matang sa isda.
Nganong tuyoan man gyud kining maong isda, kon makahilo kini dili nalang gyud mamasin kay kun mataymingan kinabuhi gyud ang mawagtang.
Naa may laing mga matang sa isda o pagkaong dagat ang mahimong kan-on kadto nalang unta aron dili masugamak. Mag-amping lang gyud.