Adunay huhungihobng, nga niadtong miaging PDP Laban, Cebu campaign rally sa Plaza Independencia, maoy sabot nga walay kamot sa kandidato nga iisa ni Presidente Duterte agi’g pag-endorso atubangan sa naglawod nga gidaghanon sa katawhan.
Mao diay’ng segun sa akong naobserbaran, human sa makalingaw’ng diskurso ni Duterte, molahos na unta siya pag-exit.
Pero, giduol kini ni Kongresista Gwen Garcia, kinsa daw adunay gihangyo, may dapit sa entablado nga gitudlo ug wala madugay mibalik si Duterte pagpuwesto sa dapit nga gisenyas ni Gwen ug didto magsugod ang inisahay sa mga kamot nga gituboy ni Duterte.
Sa mga hait og mata, sila nakakomentariyo sa ilang kaugalingon: “Hala, lakasang, Gwen, no?” Apan ubay-ubay ang nangutana: “Segurado kaha, nga ang tanang kamot sa mga kandidato nga gipataas ni Duterte maoy modaog ning umaabot May 13 election? Human sa piniliay ra gyod ni mahibaw-an.
May gihulat akong panan-aw ibabaw sa entablado. Gusto nakong makita ang ginadayeg kong public servants, silang Talisay City Mayor Eduardo ‘Eddiegul’ Gullas ug 1st District Kongresista Gerald Anthony ‘Samsam’ V. Gullas nga iapil usab ilang mga palad sa pag-isa.
Apan nabawo ko. Kay si Eddiegul ray akong namay-ongan nga gitutokag kadiyot sa kamera ug diha ra intawon nagbarog sa likod ni Duterte. Nahinabi hinuon niyag kadali ang presidente. Ni Samsam, wala ko kakita. Kini base sa coverage nga naukay ko sa internet.
Nanghalang og diyotay akong dughan. Di tanang politikong miadto didto naisa ang kamot. Hinuon di ko makabasol ni Duterte. Kay dili man kini maoy orihinal nga sabot.
Busa, pasensiya ang nataligam-an. Total, dili man boksing ang atong eleksiyon. Nga kun kinsang kamot ang iisa sa reperi maoy midaog.
Hinuon, kun ang politikong magpapili: limpiyo la’g record, dili palaaway, may mga bulawanong binuhatan nga napuslan sa katawhan, aw…wala gyuy angay’ng kabalak-an.
Alang nako, ha? Kadto lang politiko nga walay salig sa ilang kapasidad nga modaog ang magpalaban-sakay sa kapopularidad ni Duterte. Pero kadtong lig-on ug proven nang very authentic and effective diha sa ilang pagpangalagad, dili na kaayo kini needed.
Ug nakita ko kini nilang Eddiegul ug Samsam, kinsa sukad pa kaniadto ug hangtod karon, giisip kong mga tin-awng salamin sa katilingban.