Karong Abril 13, 2019 magsaulog ang Cebu City Public Library sa ika-100 nga katuigan gikan sa pagkatukod niini. Ang mga susama niini nga matang sa balay-tinubdan sa kaalam wala na kaayo igdungog sa mga kabataan gikan sa mga millenials gumikan sa teknolohiya.
Gawas sa ilang naandang mga school libraries daghan sa mga kabataan karon ang wala na gani makatultol o makahibalo nga dunay public library sa Cebu City.
Kini tungod sa pagsulbong na sa internet nga halos tanang mga pangutana matubag dayon pinaagi sa Google. Sa internet matubag dayon ang gipangita bisan naa lang sa balay o sa sakyanan pinaagi sa mga cellphones ug uban pang gadgets.
Apan ang dakong kalainan sa Google ug sa library mao kini: sa Google paspas kaayong molugwa ang mga posibleng tubag sa mga pangutana ug mga litrato o videos pa.
Samtang sa mga libraries, daghan tuod mga librong mahimong masubay apan dili tanang estudyante ang makamaong mosubay sa mga kodigo pagpangita sa mga libro, gikan sa author, publikasyon, edisyon ug uban pa.
Usa kini sa mga rason ug nakapalaay sa mga kabataan ilabi na kun ang mga libro gipangbukbok na tungod sa kakaraan.
Hinuon gamit kaayo sa mga seryusong mga tinun-an ang library tungod kay gi-obserbar man ang kahilom sa lawak haom sa pagtuon. Apan dili mahimong hangtud nalang sa pagtip-ig sa mga libro ang mga library, kinahanglan na nilang makigdungan sa panahon.
May mga modernong sistema sama sa paggamit sa internet pinaagi sa Quick Response Codes nga mao na karoy gibuhat sa mga public libraries sa ubang mga nasud.
Pinaagi niini, mas maenganyo ang mga kabataan ug mga tinun-an pagbalik sa mga libraries ug gani mahimo pang di na kinahanglang pisikal nga moadto sa libraries kun makita na pinaagi sa internet ang mga librong naa nila. Pinaagi sab niini, masaligan nga ang mga impormasyong makuha didto tinuod. Dili sama sa Google nga daghan ang dili tinuod.