Hinumdomi tawo nga sa abog ka gikan ug sa abog ka pauli

Daghan ang mga tawo nga tungod kay nahubog na sa hambog ang nahikalimot nga gikan sila sa abog. Kini ang hinungdan kun nganong daw nagtuo sila nga Dios na sila.

Kusog silang mopasiatab sa ilang nakab-ot ug sa ilang pagpasiatab nahimo silang mapagarbuhon.

Nakita ko ang usa ka tawo nga dunay nindot nga balay apan sa matag higayon nga ikaw mosulod niini ang kuyaw mao nga nahimo kang hugaw sa iyang pagtan-aw mao ni hinungdan kun nganong sa matag lakaw nimo sundon ka og trapo aron dili mahugaw ang sawog nilang sinaw.

Sa dihang niabot nga bawian na siya sa kinabuhing hinulman, nahimong hubog ang tanan kay nagdumiling mohatad kaniya sa sam-ang.

Daghan nila ang nahimong wa magpakabana sa iyang kahimtang kaha tingali kay sila niagi og kaamang sa dihang sila mismo ang nahiagom sa kamapahitas-on ning tawhana.

Ang garbo normal na sa matag tawo ug gani dunay garbo nga himsog apan dunay garbo nga makadaut ug makamatay natong mga tawo labina kun magnudnod kini kanato sa kawalay igong kapaingnan gawas sa pagtuo nga kita lang ang nia sa kalibutan.

Mubo ra gyud ang kinabuhi busa ato kining atimanon, palipangon ug gamiton sa pagdasig usab sa uban.  Kay kun bisan unsa pa kita kagamhanan sama sa uban kita usab may kinutoban.

Ug kun moabot ang maong kinutoban unsa man kaha ang atong mapaabot kun diha sa atong pagkinabuhi nahimo kitang daw mga iro nga mopaghot aron ipakita nato ang gahum nga kita mismo ang nagdelusyon.

Dili makapaubos ang pagtulon sa garbo kay dili kini makapatambok nato.