EDITORYAL - Sapa pa ba ni?

Taliabot na ang ting-init duha ka bulan gikan karon gipaabot nga momenus ang masinating mga pagbunok sa kusog nga uwan dinhi sa Sugbo nianang panahona.

Kahigayonan na kini aron moaksyon ang mga local government units nga trabahoon ang ilang mga drainage ug waterway systems.

Dinhi sa downtown area sa Dakbayan sa Sugbo daghang mga kanal ug mga sapa nga kinahanglang limpyohan.

Kataw-anan kay insulto kaayo sa Inahang Kinaiyahan nga kining mga patay nang mga sapa wala gihapon ilisi ang mga pangalan sama sa Mahiga Creek, Guadalupe River, Parian Creek, ug uban pa.

Makailad kay kun susihon kining maong mga dapita, dili sapa o suba o creeks ang makita kondili mga higante ug nanimahong kanal.

Sa wala masuhito aning mga lugara ug mapa lamang maoy gitan-aw magtuo silang daghan pa diay sapa ang downtown Cebu City.

Uwahi na sab para sa mga nabuhi aning mga sapaa kaniadto, sama sa mga isda, mga kasag,  ulang, suso, ug uban pa tungod kay mas daghan pa ang basura nungka sa tubig nga ilang malangoyan. Duna man tuod tubig apan itom ug baho pa gyud.

Bugtong mahimo nalang sa mga LGUs sama sa Cebu City nga mamentinar nalang nga wala nay basurang maglutaw-lutaw niini.

Apan aron kini makab-ot, kinahanglang sa karsada palang daan angay nga estriktuhon gyud ang mga tawo nga dili pataka og labay sa ilang basura. Kinahanglang 24/7 gyud nga dunay magbantay gumikan sa kadaghan sa mga tawo sama nalang sa dalan Colon.

Bisan makapila pa daruhon o kuykoyon kaning mga kanal, imburnal ug mga kasapaan aron habwaan og basura kun ang mga tawo dili patagmon sa ilang pagkahugawan, mahurot nalang ang pundo sa siyudad di gyud mawala ang basura padung sa mga kanal nga molahos sa mga sapa hangtud na ngadto sa dagat.