Milagroso

Bisan pa man sa Low Pressure Area kon LPA nga nagsegi og hadla hadla sa mga kalihokan sa Sinulog, wala gyud kini makatandog sa fluvial procession, solemn foot procession ug sa grand parade.

Gani sa monitoring sa PAGASA nisulod ang LPA Biyernes pa sa gabii ug gipanglantawan nga magmugna og ulan ilabi na sa hapon sa Sabado atol sa procession.

Apan wala man makabundak ang ulan, gani atol sa fluvial procession hilabihan man ka init sa adlaw ug linaw kaayo ang dagat.

Pagkahapon wala usab makasinati og ulan hangtod nahuman ang kalihokan sa kapistahan ni Senyor Sto. Niño.

Kini ang gipakita Niyang milagro ngadto sa mga deboto nga mainitong mihangop kaniya diin walay bisan unsang dautan nga panahon ang mopatigbabaw sa gimbut-an sa Balaang Bata.

Tipik lang kini sa milagro nga gipakita sa Batang Hesus tungod kay ang tanan nga anaa kanato gikan man sa Batang Milagroso.

Unsa man ang atong ibalos sa iyang kaayo? Human sa pag kompleto sa misa nobenaryo, pagsalmot sa traslacion, fluvial procession ug solemn foot procession unsa man ang sunod natong himoon?

Basin kutob lang ta sa maong mga kalihokan inig ka human wala na, unta dili lang taphaw ang atong gihimo kon dili atong poy-an.

Kini ang labing maayo nga bawos nato sa  Senyor Sto. Niño ang Batang Milagroso!