Nakalingkawas sa taas unta nga tuig nga pagkabilanggo si kanhi senador Ramon “Bong” Revilla sa dihang giabsuwelto kini sa Sandiganbayan sa niaging semana sa kasong plunder may kalabotan sa pork barrel scam niadtong senador pa siya.
Kay kon nasuta pa sa Sandiganbayan nga aduna gyud siyay papel sa paghatag og P224 milyones gikan sa iyang Priority Development Assistance Fund o PDAF ngadto sa kolurom nga mga foundation, mokabat sa 40 ka tuig unta siyang magtingkagol sa bilanggoan.
Hinuon konbiktado si Janet Napoles, ang giingon nga “pork barrel queen,” ug ang kanhi chief of staff ni Revilla nga si Attorney Richard Cambe sa salaud paghandos sa PDAF ni Revilla ngadto sa mga peke nga mga organizations.
Nakita sa Sandiganbayan nga nagkulang ang prosekusyon pagpresentar og mga ebidensiya nga nagprobar nga nakadawat si Revilla og milyones nga komisyon ug kickbacks sa iyang PDAF nga giingon nga gisuyop ngadto sa mga peke nga organisasyon ni Napoles.
Niining iyang kagawasan, puwerte nga lipaya ni Revilla. Matud niya padayon kuno ang iyang pagpakigbatok sa mga alegasyon batok kaniya.
Hinuon aduna pay mga kaso nga nag-ung-ong batok kaniya.
Taas pa ang iyang sagubangon sa iyang kampanya nga malimpiyohan gayud ang iyang ngalan.
Hinuon sa maong desisyon sa Sandiganbayan, wala gyud matino kon sad-an ba si Revilla. Igo lamang giingon niini nga kulang ang ebidensiya nga gipresentar sa prosekusyon batok sa kanhi senador.
In fairness usab ni Revilla, basin kun wala gayud kini kasayuran sa “pork barrel scam.” Basin maniubra lamang kadto sa iyang mga sakop sa opisina.
Kun aduna man gani iyang pirma sa mga transaksiyon, basin kun gipeke kini niadtong mga nala mbigit sa scam.
Unsay epekto sa susamang mga kaso batok sa ubang mga magbabalaud kining pagkaabsuwelto ni Revilla? Kon si kanhi senador Jinggoy Estrada maoy pangutan-on, dako iyang kumpiyansa nga makalingkawas usab siya sa susamang kaso.Hinuon ato lamang atangan.