Personal nga giduaw ni Presidente Rodrigo Duterte niadtong Biyernes sa gabii ang mga biktima sa landslide diha sa dakbayan sa Naga.
Didto sa Enan Chiong Activity Center diin kasamtangang gipahiluna ang dul-an sa 1,500 ka mga pamilya nga apektado sa landslide, gitug-an sa Presidente nga abagahon niya ang gasto sa pagpalubong sa mga namatay ug ingon sa tambalanan niadtong mga naangol.
Gipahibawo sab sa Presidente nga hatagan og pinuy-anan sa gobiyerno ang mga apektadong residente. Ang probinsiya mohatag og relocation site samtang ang national government pinaagi sa National Housing Authority maoy motukod og mga panimay nga kapuy-an. Sa akong nasabtan sa gisulti ni Duterte nga dili ni libre ang mga pinuy-anan. Bayran ni apan pinaagi sa sayon nga data data.
Apan sagad sa mga apektadong pamilya nagtuo nga di relocation ang ilang gikinahanglan. Gawas niadtong kang kansang mga pinuy-anan natabonan sa yuta, ang sagad sa mga pamilya nagtuo nga dili pinuy-anan ang ilang gikinahanglan tungod kay duna man silay kaugalingon nga mga panimay.
Ang ilang gikinahanglan mao ang igong proteksiyon sa gobiyerno gikan sa mga hulga sa kinaiyahan tungod sa grabing pag-abuso sa mga hakog nga negosyante sa atong kalikupan.
Simple ra ang gusto sa mga molupyo sa Naga, dili pinuy-anan ang ilang gipangayo kon dili ipahunong sa gobyerno ang padayong pagguba sa kabukiran pinaagi sa quarry.
Nagtuo ang mga molupyo nga ang quarry sa usa ka higanteng kompaniya maoy nakaingon sa pagdahili sa bukid didto sa Sitio Sindulan, Barangay Tinaan niadtong miaging Huwebes sa buntag.
Busa usa sa mga molupyo nangahas pagpaabot sa ilang sentimento ngadto ni Duterte atol sa pagbisita niini. Apan sa dakong kasagmuyo, milingiw si Duterte sa direktang hangyo sa usa ka molupyo nga ipahunong ang quarry diha sa Naga.
Inay tubagon ang hangyo sa apektadong molupyo, misimang ang Presidente sa iyang tubag pinaagi sa paglampornas sa New People’s Army ug sa founder niini nga si Joma Sison.
Sa gihimo ni Duterte misiwil ang kamatuoran nga di niya kayang pug-okon ang mga higanteng kompaniya nga maoy sagad dako og tampo sa kampanya panahon sa eleksiyon.
Ang angayan unta niyang gibuhat kon di siya andam motubag sa maong hangyo mao ang pagtawag ni DENR Secretary Roy Cimatu nga uban niya niadtong higayona ug pagmando nga tun-an posible ba kining mahitabo.
Nakasabot ko nga dili mahimo nga diha diha mosanong ang Presidente tungod kay dunay mga legalidad nga angayang ikonsiderar sa paghimo niini. Apan di husto nga mosimang siya sa isyu.