Gidili sa Ginoo ang pagpatay. Apan kada adlaw adunay tawong gipatay. May adik, pusher, polis, politiko, piniriso ug hitman – ang makauna lang. Ang pait, dili gyud dayon mahibaw-an ang nagpatay. Kay gawas nga nagtaptap o nag-full face helmet ang mamumuno, labanan gyud sa ilang labaw, labi na’g ang hitman naunhan o nabaslan... ay, itago gyud palayo sa nakasaksi!
Ning War on Drugs ni Tatay Digong, klaro kaayo kon kinsay iyang gipasabong. Tanang dautang elemento nga nahilambigit sa illegal drugs, gagmay man o dagko, kinsa naa sa iyang listahan batok sa kinatibuk-an niyang puwersa sa kapolisan maoy pirmeng naggubat halos kada adlaw, diin wala gyuy sipyat, aduna gyuy mamatay.
Ang nakabentaha lang sa kapolisan kay may order si Tatay Digong nga payhagon gyud sa hingpit ang grupo sa illegal drugs synidicates.
Ug misaad nga suportahan gyud niya ang iyang kapolisan sa higayon nga makapatay kini’g mga dakponon nga mosukol sa mga kamot sa balaod panahon sa ilang operasyon.
Sa kabahin pud sa mga big boss sa illegal drugs, kon ang kagamhanan sa Pilipinas may kaugalingong special forces nga gitahasan sa paggukod nila, sila sab mismong kadagkoan sa drugs syndicate may kaugalingong personal or privately well-financed armed men nga andam mopatay ug magpakamatay sa mga anino nga gustong mopapas sa ilang daotang binuhatan ning kalibotan.
Nga sa ato pa, kon ang katawhan nga nakasaksi sa mga dugoong hitabo sa kadalanan nagduda nga may hitman ang kapolisan, ang mga big boss sa illegal drugs activities, aduna sab.
Ang nakaparat, kay aduna poy military o polis nga miapil og duwa ning gidiling drugas nga makapabuhong man tuod sa lawasnong panginahanglan apan makalaglag sa kalag.
Mao nga dili na ikahibulong nganong mag-unay ang mga polis pagpinatyanay. Kay adunay polis nga dili lang ang gobiyerno maoy nagsuweldo, kondili, may drug lord pud! (Kini, matud pa sa usa ka tigpaniid, ha?)
Tungod sa gahom sa shabu, nauso ang pinatyanay sa Pilipinas. Diyutay na lang ang nakatultol sa simbahan ug nahimong walay bili ang sagradong mga kinabuhi nga giumol sa atong Magbubuhat. Nagpasabot ba kini nga wala na makailag Ginoo ang tawo.?