Pakalma sa paspas nga pinitik sa kasingkasing (3)

Sagad sa mga ‘electrolytes’, makuha kini gikan sa mga pagkaon og avocado, saging, kamote ug spinach. Mga dasok kini nga tinubdan sa potassium, ug aron sab makakonsumo og daghang calcium, anaa kini sa dahonang mga utanon nga ‘green’ ug sa produkto sa bakahan (dairy products) nga linawgan sa preskong mga kasagbotan (grass feed), nga dasok sab ni sa magnesium, hasta ang mga mani (nuts) ug mga isda nga tuna, o mackerel.

* Likayan ang mga ‘stimulants’ – sama sa adiksyon sa kape (caffeine), kay makapakusog kini sa pinitik nga mosangpot sa pagkasakit sa kasingkasing, nga dako’g posibilidad nga maglisud ka na sa pagginhawa. Hasta ang palainom og alcohol, hinigarilyo, o hinabako, mintinans nga medikasyon, o drugas, kalagmitan niini makasamot sa problema sa kasingkasing.

Mag-obserbar kita sa kaugalingon, nga pamation ang kondisyon sa lawas kon unsa’y angay menosan, o likayan aron makalingkawas nga maangkon ang kaayohan nga mohimsog ang atong panglawas.

Ubang paagi o dugang pagtambal niini nga kasoha, wala na kaayo kinahanglana ang pagtambal, mas maayo nga kita na mismo ang makahibalo unsa gayu’y nakaingon niini, mas labaw pa kita sa doctor sa kaugalingon, kay kita man ang mas nasayod kon unsa’y atong gibuhat nga naingon kita niini.

Unsa man ang naglabing kinaham nga makadaot, simple lang ato na nga likayan, o biyaan ug maoy palabihon ang dili mo naandan nga makaayo sa panglawas. Maoy iprayoridad nga disiplinahon ang kaugalingon sa pagnunot sa makapahimsog nga estilo nato sa pagpakabuhi, aron pagkab-ot sa hapsay ug malipayong kinabuhi, kay lagi nakabaton na man kita og himsog nga kasingkasing.