Samtang ang kinabag-an sa dul-an sa 20,000 nga moapil sa Grand Halad sa Kapamilya tibuok adlaw karong Sabado, Nobiyembre 18, sa Main Campus sa Cebu Technological University (CTU) makapahimus sa labing dakong piyesta sa libreng mga pangalagad, nia ang mga boluntaryo nga moatiman nila:
Kapin sa gatus ka doktor nga naglakip sa mga dentista ug mga espesyalista sa mata ug veterinarians;
Kapin sa gatus ka nurses, pharmacists, radiology technicians, medical technologists;
Kapin sa gatus ka abogado ug mga tinun-an sa abogasiya; ug
Kapin sa gatus ka magtutudlo, IT technicians, polis, sundawo, masahista, barbero, manikyurista ug security officers.
* * *
Saw-an nilang dul-an sa milyon ka pesos nga mga tambal sa ubo, sip-on, hilanat, high blood pressure, arthritis, diabetes ug mga bitamina, sa mga maibtan og ngipon ug sa mga iro ug iring.
Mapahimuslan sab ang dul-an sa milyon ka pesos nga balor sa kapin 3,000 ka laboratory services nga naglakip sa chest X-Ray, urinalysis, total cholesterol, fasting ug random blood sugar, complete blood count ug blood typing.
* * *
Malibre ang kapin sa milyon ka pesos nga balor sa konsultasyon sa mga doktor sa kapin sa 2,000 ka pasyente; kapin sa milyon ka pesos nga balor sa pag-ibot sa mga ngipon sa dul-an libo ka pasyente; ug dul-an sa tunga sa milyon ka pesos nga balor sa paghiling sa mata ug antipara sa dul-an libo ka pasyente.
Malibre sab ang kapin sa milyon ka pesos nga balor sa kapon, bakuna, purga ug tupi sa gatusan ka iro ug iring; ug kapin sa P100,000 nga balor sa tupi, manicure, pedicure, reflex ug masahe sa dul-an libo ka kustomer.
* * *
Ihalad ang kapin sa P300,000 nga balor sa pag-ayo sa gatusan ka cell phones, laptops, desktops ug tablets; dul-an sa P100,000 nga balor sa konsultasyon ug notaryo sa kapin sa gatus ka kliyente sa mga abogado; ug kapin sa P300,000 nga balor sa libreng pagkaon ug tubig.
Ihalad sab ang kapin sa milyon ka pesos nga balor sa pagtudlo sa mga panginabuhi, teknikal nga tambag sa mga enhinyero, abangan sa mga trak ug mga tulda ug seguridad gikan sa mga polis, sundawo ug boluntaryo.