Aron usab kita molampus sa atong mga pangandoy niining kinabuhia, mahinungdanon nga kita makahibalo sa kinaiya sa mga nagmalampuson. Gihimoan kini og pagtuon, aron kanato ipaambit. Seryusohon nga ato ni nga tamdan, sama sa mga mosunod;
* Nagsubay sa kalamboan – giseguro kanunay ang pagpalambo sa iyang kalihukan nga may kaugmaran segun sa iyang mga laraw. Dili gusto nga malangan o mausik sa kawad-on ang iyang paningkamot.
* Pagkat-on sa kasaypanan – maoy gihimong leksyon ang mga nasinati nga kapakyasan, aron makakat-on sa pagbarug nga lig-on, uban ang kausaban.
* Gigugol o gigamit ang oras - kauban ang mga kapareho niyang mga mapangandoyon aron may kaabag sa pagmugna og mga maayo nga ideya. Mga tawo nga nagbaton og positibo nga panghunahuna, nga malaumon sa paglampus.
* Pagmintin sa kinabuhi nga balanse – maantigo modala sa kinabuhi nga dili basta mosibog. Makamao mopahiluna sa pagbuntog sa kalibog, aron mapalugdang ang katin-aw sa husto nga pagdisisyon.
* Gisulat ang tumong ug tinguha – nagbaton siya og listahan, nga kagiyahan sa iyang tumong ug tinguha niining kinabuhia. Nakaandam ang mga alternatibo o kausaban, aron mosibo sa padulngan nga katuyoan. Sublion kanunay ang pagbasa aron pagmatikod sa sitwasyon kun mitipas ba sa laraw.
* Malungtaron og panghunahuna – dili lang nakahan-ay sa mga butang nga alang sa hamubo nga programa. Nakalatid na usab ang mga malungtarong panghunahuna, nga gianam paglig-on ang matag panahon. Inandaman nga kahawanan sa mga kakulian aron maseguro nga maabot sa hingpit ang gitinguha nga kalampusan.