Sleeping with the enemy ang paghulagway ni PNP Chief Ronald “Bato” dela Rosa sa iyang sakop nga si Superintendent Maria Cristina Nobleza nga nasikop sa Bohol kauban ang iyang driver-lover nga si Reenor Lou Dungon nga usa ka bomb expert nga miyembro sa Abu Sayyaf.
Sila ang giingong mo-rescue unta sa mga nahibiling sakop sa Abu Sayyaf nga padayong gilutos sa mga tropa sa kagamhanan didto sa Bohol.
Makapakugang kay samtang nakigkumbate ang mga tropa sa gobiyerno sa mga bandido, aniay gikan sa ilang organisasyon nga usa gyud ka opisyal sa kapolisan ang ni-reinforce sa kontra.
Giingon ni General Bato nga nabuang sa gugma ang iyang sakop maong wala na makahuna-huna sa iyang gihimo ug nagpadala sa pinitik sa iyang kasing-kasing nga nakapusta sa mga terorista.
Nakahinumdom lang ko sa giingon kanako sa usa ka news source kaniadto kun nganong dili gyud masumpo ang mga bandido tungod kay dunay mga dagkong opisyal sa PNP ug AFP nga nagpaluyo kanila.
Gani ang kita nilang kuwarta gikan sa kidnap for ransom, dagko kaayo og pahat ang ilang mga padreno nga opisyal. Ang pagkasikop ni Nobleza maoy naka-validate sa akong katahap ug sa giingon sa akong source kaniadto.
Ang kidnap for ransom dako kaayo kining panguwarta, dili lang sa mga bandido, kun dili sa mga badlungon nga opisyal sa gobiyerno. Kun ang ilegal nga drugas naka-penetrate sa PNP ug ubang ahensya sa gobiyerno, ingon usab niini ang mga bandido.
Ang ilegal nga drugas, peso, apan ang kidnap for ransom dolyar, gikan sa mga langyaw nga ilang madagit. Dili lang gugma ang isyu ni Nobleza, kun dili, ang kahangol sa kuwarta.