Taas-taas ang bakasyon. Hinaot nga taas-taas usab ang panahon sa pagpamalandong ug paghinulsol, kay mao kadto ang katuyoan sa taas nga bakasyon, aron kahatagan kita’g tukmang higayon pag-accounting sa atong mga binuhatan kun nasubay ba sa kabubut-on sa Ginoo, o sa iya ba niining kalibutan.
Karon, unsa man? Balik sa normal? Balik sa mga bisyo? Balik sa pagpakasala? Imo na ni. Wa na’y labot ang Ginoo niini, ug hinaot nga nakaila na kita kinsa si Jesus kay hangtod karon, daghan pa ang wala makaila Kaniya.
Aniay gikan ni Doming Chaves, OSCA head sa Dakbayan sa Sugbo, nagpaila kinsa si Jesus:
In Chemistry, Jesus turned the water into wine. In Biology, He was born without the normal conception. In Physics, He defied gravity by ascending to heaven. In Economics, He disproved the Law of Diminishing Return by feeding 5,000 with only 2 pieces of fish and 5 loaves of bread. In History, He has no beginning and no end. In Politics, He came to serve, not to be served. In Religion, He is the Son of God who died and resurrected, conquering death, to open heaven’s gate for us.
Kompleto. Karon nahingpit na ang imong pag-ila kinsa si Cristo. Nakaila ba usab kaha kita kinsa kita?
* * *
Flying taxi. Literally, nagkahulogan og taxi nga molupad. Seguro kini nga makasulbad sa suliran sa trapiko, kana kun maka-afford kita niini.
Sa Germany, ang nagmugna niining maong flying taxi, ang E-Volo nga naghuwat na lang sa approval sa U.S. Federal Aviation Authority ug sa European Aviation Safety Agency, nga kun maaprobahan, ginganlan og Volocopter 2X, makapamasahero na kini sunod tuig. Ngilngiga no?
Kita dinhi, unsa man? Habal-habal. Pastilan, pagka-behind gyud nato uy! Kanus-a kaha magsugod pag-uswag ang atong nasud no?
Convenient kaayo ang volocopter tungod kay vertical ang pag-take off ug pag-landing. Sa ato pa, wala magkinahanglan og lapad nga espasyo, mahimo nga maka-landing sa Plaza Independencia, o sa Fuente Osmeña. Ang Singapore usab naglaraw pagpalupad og mga flying taxis, apan sa mga tuig 2030 pa. Apan, sa China, ang Ehang Co. nag-develop usab sa ilang kaugalingon nga quadrocopter, diin ang United Arab Emirates naglaraw pagpalupad niini sa Dubai karong tuiga gayud. Samtang ang Airbus nag-develop usab og driverless nga flying taxi nga mag-testing na sila karong tuiga, ug ang Uber usab nagtuon ning maong matang sa teknolohiya. Akong usbon, kita dinhi, unsa man? Habal-habal ra gyud. Pakapinan og mga tricycle. Pastilan!