Makabalik pa ba kaha si kanhi mayor Mike Rama sa kasikat karon nga gihinganlan na usab siya og balik ni Presidente Duterte nga nalambigit sa ilegal nga drugas?
Human siya hinganli, wala usab siya’y laing tubag gawas sa pag-ingon nga gusto gyud siya nga makigkita kang Duterte. Gusto tingali ni Rama nga maparehas siya ni Peter Lim nga kasab-an atubangan sa camera unya ibandana sa publikong telebisyon o sa Facebook.
Dili gyud makatupong si Rama kang Peter Lim kay si Peter Lim “kumpare” man ni Duterte tungod sa negosyanteng adunay minahan sa Mindanao nga si Ding Borja, busa nagtuo ko nga dili gyud siya tagdon sa presidente.
Bisan sa pagkalambigit kaniya, si Rama padayon gihapon nga nagtuyoktuyok aron sa pagpahibalo sa iyang mga dumadapig nga wala pa mamatay ang politikanhon niyang personalidad, bisan sa iyang kapildehan niadtong miaging eleksiyon.
Apan may mga kapitan ug mga konsehal pa hinoon nga sakop sa iyang team niadtong eleksiyon nga miila pa gihapon ni Rama isip lider sa oposisyon. Gani, ang iyang mga konsehal maoy mayoriya karon sa konseho. Gibuhi usab ang tabitabi bahin sa recall election.
Taliwala sa pasangil nga nalambigit si Rama sa drugas isip protektor, maglisod siya og bangon sa iyang politikanhong personalidad hangtod nga iyang maesplikar pag-ayo ang kamatuoran ug malimpyo ang iyang ngalan.
Para nako, higayon na nga hinuklogan sa mga sakop sa oposisyon ang ilang posisyon karon. Angay pa ba nilang ilhon si Rama nga ilang lider bisan kanunay siya nga gihinganlan sa presidente nga nalambigit sa drugas?
Niadtong miaging semana, si Presidential Assistant for the Visayas Mike Dino mipaklaro nga ang iyang giilang lider sa oposisyon mao si Bise Mayor Edgardo Labella.
Sama sa nahitabo sa Liberal Party, dihang napilde si Mar Roxas kang Duterte pagka-presidente ug mibiya si Noynoy Aquino sa Malacañang, silang duha wala na magsabasaba isip mga simbolo sa oposisyon sa kasamtangang gobiyerno.
Kinsay giila nga lider sa Liberal Party? Dili ba si Leni Robredo? Ngano man? Kay siya man ang sakop sa Liberal Party nga naghupot og kinatas-an nga puwesto sa gobiyerno. Mao nga gawas nilang Senador Leila de Lima ug Antonio Trillanes IV, si Robredo ang saba kaayo nga kanunay’ng nanaway sa presidente.
Kun naglantaw si Mike Rama sa kaugmaon sa iyang grupo, maantigo siya nga mopaubos ug modawat nga ning mga panahona, mas mabun-og lang siya sa mga pagsaway gikan kang Mayor Tomas Osmeña.
Ang mga kapitan mahimo na nga makahinayhinay og hugpong sa ilang panon paingon kang Labella. Si Labella nga grabeng kamapahiubsanon ug kakalma, igo lang sa pagngisi ug pagpasalamat sa dakong responsibilidad nga angay na niyang sugdan og pas-an karon.