Dear Atty. Divine,
Dunay property nga sinunod ang akong mama ug duha ra unta sila nga magbahin kay duha ra man sila ka magsuon. Ang akong mama kay tua man magtrabaho sa gawas mao nga wa dayon makaatiman sa maong property ug wa kini nila mabahin sa iyang igsuon. Karon, nahibaw-an sa akong mama nga gipa-transfer na man sa iyang igsuon ang titulo sa maong property ngadto sa iyang pangan ug wa man niya bahini si mama. Unsay angayan namo nga buhaton? Maglisud man sa pagpasaka og kaso si mama aron sa pagbawi sa yuta kay wa man siya diri sa Pilipinas. Unta matabangan mi nimo attorney. —Tata
Dear Tata,
Aron maprotihean ang interest sa imong mama sa property nga gi-solo sa iyang igsuon, mahimo siya nga mo-execute og Affidavit of Adverse Claim ug iya kining ipa-annotate sa titulo sa maong yuta ngadto sa Register of Deeds. Ang Annotation maoy magsilbing notisya sa katawhan nga ikaw adunay claim sa maong yuta busa kun kini ibaligya sa iyang igsuon masayran gyud sa gustong mopalit nga adunay laing claimant ang property. Ang Affidavit of Adverse claim mahimong adto panotaryuhan sa imong mama sa Philippine Embassy sa nasud diin siya nagpuyo. Laing buhaton sa imong mama mao ang pagpasaka og reklamo sa barangay diin mahimutang ang property ug tungod kay wa man siya ngari mahimo siyang mo-execute of Special Power of Attorney or SPA nga maghatag kanimo og katungod nga maoy magsilbing representante kaniya ngadto sa barangay o sa korte sa iyang tinguha nga pagkuha sa iyang share. Ang SPA adto gihapon kini panotaryuhan sa Philippine Embassy sa nasud nga iyang gipuy-an. Kun di mo mahusay sa barangay, then modangop gyud kamo sa korte. Thanks and God Bless ! —Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.