Nag-drive ko sa akong multicab sa dihang duha ka mga tiguwang misakay kay magpagaling sa ilang mais. Pag-abot sa may Bawo usa kanila ang mihatag og 40 pesos. Ako kining gibalibaran apan hugtanon ang usa nga mihatag niini. Maayo na lang ni Dong sa imong gasolina. Igo lang kong mipahiyom kay ang maong tiguwang naghunahuna kun unsa ang iyang mahatag. Kini ang kinahanglanon sa matag usa nato. Mahinungdanon kaayo ang pagkamanggihatagon ug pagkamapaambiton sa bisan unsa nga atong nahuptan gikan sa mga tawo nga kanato motabang. Dili kini pagpagarbo kun dili paagi kini sa pagpakita nga diha sa kinabuhi mahinungdanon kaayo diay ang paghunahuna dili lang sa kaugalingon kun dili usab sa uban kay angay natong hibaw-an nga kun unsa ang atong himuon nga maayo sa uban ang mobalik gyud nato ingon nga panalangin gikan sa kahitas-an.