Kun motrabaho murag kuto kun mukaon murag awto

Kini ang nadunggan ko sa akong higala nga nagbagulbol sa iyang kaubanan nga kupad kaayo mulihok apan kusog kaayo mulamoy kun tingkaon na. Igo lang kong nikatawa sa iyang gipamulong. Apan daghan ning panahona ang buot modawat og limpyo ug dili buot nga maghago ug magpatulo sa singot. Sa laktod daghan karong mga panahona ang nahimong mga tapulan ug way igong kusog nga manlimbasog alang sa tingusbawan. Mahinungdanon ang pagkugi aron matuman ang bisan unsang gisugo kanato.

Apan katungdanan usab sa nagsugo nga sa di pa siya mosugo iya unang han-ayon ang tanan aron sa ingon mamahimong mas paspas sa gisugo nga tumanon ang iyang gisugo. Sama pananglit sa giingon nga kun buot nimong matukod ang usa ka balay, kinahanglang imong andamon ang mga materyales nga maoy gamiton sa panday sa pagbuhat sa ingon.

Kay di maayo nga mao pay mopanday unya mao pay mangita sa materyales. Sa katapusan mamahimong mas makahuloganon ang mulihok ta aron di lang mabuhi kondili aron usab atong mapadayag ang atong kaugalingong hunahuna, pagbati, ug tinguha.