Sentensiya sa mga kriminal

Niining umaabot nga bag-ong termino ni kanhi Kongresista ug mayor Tomas Osmeña, makapaabot kita og dugoon nga mga panghitabo sa dakbayan sa Sugbo. Dugoon tungod sa iyang bahad batok niadtong mga sagbot sa katilingban.

Sa niaging mga adlaw, mitanyag si Osmeña nga mohatag siya og P50,000 alang niadtong pulis nga makahagba og kriminal. Kini isip iya kuno nga paagi aron pagbalik sa kahusay ug kalinaw sa dakbayan.

Grabe na kuno ang pagsiaw sa krimen sa dakbayan karong panahona. Ug paagi sa umaabot nga mayor nga mobalos sa mga kriminal pinaagi sa pagpakusog sa siguridad sama sa paghatag og dakong ganti sa kapolisan pagpuhag sa mga kriminal.

Dili na bag-o kini nga lakang ni Osmeña. Sa siya pa ang mayor kaniadto, adunay higayon nga daghan sa mga bugok sa katilingban ang nangahagba. Kada adlaw, drug pusher o snatcher o kawatan o tulisan ang nahuwis de kutsilyo sa mga vigilante.

Tuod man nangalagiw ang mga kriminal kay hadlok lagi nga maabtan sa ilang signos. Milinaw tuod ang dakbayan kaniadto tungod kay wa nay magpanuko pagbuhat og krimen. Hangtud nga mipahuway usab katong mga vigilante.

Apan sa pagpuli sa laing administrasyon, mibalik paggimok ang mga badlongon sa katilingban ning dakbayan. Inanay usab nga mibalik ang pagkuyanap sa druga, kawat, tulis ug uban pa. Hangtud karon, walay adlaw nga walay kawat, tulis ug uban dinhi sa dakbayan.

Hinuon niining tanyag ni Osmeña sa kapolisan, siguradong daghan na usab ang manghay-ad nga mga kriminal. Siguro dili na kadtong mga nagtakoban og  pagka-vigilante ang mopitol kanila kondili ang kapolisan na mismo ang mangunay. Ug mobibo na usab ang negosyo sa punerarya dinhi.

Hinuon, kun ako ang pangutan-on, mas maayo kining tanyag ni Osmeña nga dakong kantidad alang niadtong pulis nga makatumba og kriminal. Mensahe kini ngadto sa mga badlongon aron nga hunongon na nila ang ilang binuhatan.

Kay kun mopadayon pa sila sa ilang kalaki dinhi sa dakbayan, nan dila ra unya ang walay labud kanila. Walay rason nga dili sila tinud-on sa kapolisan, ilabina nga adunay paon nga ganti ang administrasyon ni Osmeña aron pagtukob kanila.