Auriculo Therapy (2)

Sa ‘auriculo’, ang paghiling sa pasyente kun asa ug unsa ang kahimtang niini sa panglawas, mao lang ang pagtan-aw sa katibuk-an sa imong dalunggan. Mailhan nila sa porma sa dalunggan, nga kun dili balanse o pareho ang gidak-on o niburot sa tuo o sa wala, usa na ni sa timailhan nga may problema ang lawas.

Unya, hikapon nila kini diin nga kun mosanting o mosakit kadto’ng mga dapit sa dalungga’ng gipislit, mahibaloan nila kun asa adunay kadaut o wala na mogana o motrabaho nga parte sa lawas. Nga mao’y nakaingon sa imong mga gipamati nga mga sintomas sa sakit o sa imong kaluyahon.

Diha ra sab sa parte sa dalunggan, himuon ang pag-ayo sa tana’ng  depektoso’ng parte sa lawas, pinaagi sa sistima sa pagpisil sa dalunggan o  ‘ear acupressure’, o ‘ear acupuncture’, nga tusloka’g pino’ng mga dagom ug pagtanom og ‘earseeds’ nga ipapilit sa apektado’ng ‘meredians’ sa dalunggan, aron kini sud sa semana, imo permi kini pislit-pisliton nga tandogon, aron sa pagseguro nga normal na’ng mogana ang mga luyahong parte sa lawas mo.

Sa kagamay sa dalunggan, mora’g dili katuohan nga naa tanan gibutang sa Dios, ang pag-ayo sa lawas, kun duna’y kakulian o kahasol nga gipamati, bisan asa’ng parte sa lawas nato. Gani, may mga remedyo nga kita mismo makahimo sa kaugalingon, kun ugaling abuton ta’g kalaay o kadukaon, ato lang pisliton o bitad-bitaron ang ubos nga bahin sa dalunggan, diha-diha moabtik mga mata .

Disbentaha nga di dayon maseguro ang pagresponde sa ‘reflex o auricular points’ nga  sa dapit diin sagad nalungagan nga gitauran og ariyos (earing) kay maalkontra, depende sa metal, nga naghata’g ‘electrical charge’ nga ‘positive ions’ kun gold o ‘negative ions’ kun silver nga ariyos. Hinuon may remedyo kini.

Huma’g ‘auriculo therapy’, abagan nga imintin ang kompleto’ng nutrisyon.