Booo ang nadungog sa palibot sa Cebu City Sports Center diha nga gitawag ug gipasaka sa entablado ni suspended Mayor Mike Rama si Bise Presidente Jejomar Binay, Senador Gringo Honasan, Junjun Binay ug uban pa.
Didto usab sa entablado ang uban nga mga opisyal sa dakbayan sa Sugbo, ingon man ang mga barangay officials. Kini ang hinungdan ngano nga dili kaayo klaro kun para kang kinsa ang booo, apan ang kadaghanan nagtuo nga para kadto sa bise presidente nga mi-greet og maayong pista sa mga taga Sugbo.
Ang booo hinay ra, gani si Senador Honasan ug Mayor Rama wala kuno makadungog niini, apan gawas ni Rama ug Honasan, ang didto sa Cebu City Sports Center nakadungog gayod sa booo. Igo-igo ra ang gikusgon sa pag-booo nga makadungog gayud ang bise presidente.
Ang kampo sa bise presidente dali nga nakapamasangil sa mga dumadapig sa Partido Liberal nga maoy nagpasiugda sa pagpakauwaw kang Binay, apan dali ra usab kini nga gipanghimakak sa LP.
Dili angayan nga basulon sa bise presidente ang kampo sa Partido Liberal kun gi-booo-han siya sa mga tawo kay walay makakontrol sa tagsa-tagsa nila ka pagbati.
Ako nakaseguro nga wala gyud kadto sila sugoa sa Partido Liberal dinhi sa Sugbo kun ugaling atong ibutang nga mga taga Liberal ang naghimo sa pagpakauwaw ni Binay.
Kun aduna may mabasol sa nahitabo ni Bise Presidente Binay sa iyang pagsaksi sa Sinulog sa Sugbo, walay lain kun dili ang nag-imbitar ra usab kaniya nga si suspended Mayor Rama.
Ang nahitabo dili maayo tungod kay nagpakita lang kini sa walay pagrespito nato sa bisita nga atong giimbitar nga motambong sa ikapanghambog nato nga Sinulog sa Sugbo.