Dear Atty. Divine:
Usa ko ka asawa apan gibiyaan ko sa akong bana nga seaman sud na sa lima ka tuig. Ang akong mga anak pulos na nagtrabaho ug maoy nagsuporta kanako kay Sr. Citizen na man ko ug dugay na nga wa ko magtrabaho. Akong nahibaw-an nga ang akong bana nagsakay gihapon og barko sa gawas sa nasud ug sukad sa iyang pagbiya kanamo wa gyud siya mohatag og suporta. Naglisud ko karon Atty. tungod sa akong maintenance sa tambal. Ang akong pangutana mamahimo ba ako nga maka demand og financial support sa akong bana? Unsa may angayan nako nga buhaton? Hinaut imo kong matabangan. Daghang Salamat. — Susan
Dear Susan:
Isip legal nga asawa, aduna kay katungod nga mangayo og financial support sa imong bana basi sa Article 105 sa atong Family Code nga nagkanayon nga ang magtiayon obligado sa pagsuporta sa usa’g-usa. Ang maayo nimong buhaton karon mao ang pag-adto sa OWWA kay aduna man silay records sa tanang seaman ug magpatabang ka sa pagpadala sa imong bana og demand letter alang sa suporta sa imong tambal, pagkaon ug uban pang panginahanglan. Mamahimo sab ka nga modangop og abogado alang sa pagpadala og demand letter sa imong bana. Kun iyang ibalewala ang imong demand letter then mamahimo ka nga modangop sa korte alang sa imong gipangayo nga suporta. Thanks and God Bless. — Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St. Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.