Mikilab lang ang Pasko ug ang unang adlaw sa Bag-ong Tuig. Ambot kun duna bay epekto sa atong kinabuhi ang pagsaulog sa Pasko, ug ambot kun may nabag-o ba sa atong kinabuhi dungan sa pagbag-o sa tuig.
Kun walay epekto nganhi kanato ang maong mga kasaulogan, mahimo ra diay nga dili kita magsaulog sa Pasko, ug dili na kinahanglang magsaba-saba kita sama sa Davao City inigsugat nila sa Bag-ong Tuig, ug dili kinahanglan nga magbag-o kita sa kinabuhi nunot sa pagbag-o sa tuig.
* * *
Karon, duha ka dagkong event ang atong gipaabot, ang Sinulog 2016 ug ang International Eucharistic Congress. Niining duha ka okasyon, ang Sugbo mahimutang na usab sa sentro sa mga pagtagad sa tibuok kalibutan, ilabina na ang IEC.
Sa atong pagpaabot sa Sinulog, unta dili nato i-limit ang atong pagsaulog unya sa grand parade, kun dili, atong i-sentro ang pagsaulog sa gipahinungdan sa kasaulogan… ang Santo Niño.
Ug atong ipahinumdom nga maayo gyud nga kompletohon ang siyam ka adlaw nga novena-masses aron dunay dakong kahigayonan nga dunggon ang atong mga pag-ampo.
Ug ato usab ipahinumdom nga ang Sinulog dili Mardi Gras’, kun dili, usa lamang ka pagsayawsayaw sa kadalanan, pahinungod gihapon sa Batang Hesus. Dili kiat-kiat.
Tungod kay duna pay mga sakop sa media nga mapasigarbuhon nga mo-refer gihapon sa Sinulog isip mardi gras. Atong ipahinumdom ang kahulogan niini: “Shrove Tuesday.” Ang Shrove Tuesday nagkahulogan og “the day before Ash Wednesday.” Busa, nganong ma-Mardi gras’ man ang Sinulog?
* * *
Unya, gumikan lagi kay sa kapin sa 100 ka milyon nga Pilipinhon, aduna may kapin sa 300 ka Pinoy ang maangol gumikan sa pagpabuto, pagsugat sa Bag-ong Tuig, gisugyot nga mosunod kita sa Davao City nga did-an na ang pagpabuto.
Supak ko niini. Maayo gyud nga mag-alegre ug magsabasaba kita sa unang adlaw sa Bag-ong Tuig. Magpabuto gihapon ta, ang i-ban ang mga pabuto nga makaangol ug makapatay. Obligasyon na kini sa gobiyerno ug sa mga mopalit niining matanga sa pabuto.
Kun makontrolar sa gobiyerno ang paggama niining makaangol nga pabuto, dili kinahanglan nga idili ang tanang matang sa pabuto.
Ug ambot ngano nga tuyoan man gayud sa uban ang pagpabuto sa mga rebentador nga makaputol sa ilang tudlo ug kamot? Ila kining mga tinuyoan0.
Imagine kuno, kun pareha sa Davao, walay magpabuto ini’g Bag-ong Tuig! Mingawa no? Maayo pa ang adlaw sa mga patay kay alegre pa ang mga menteryo! Pasagdan lang gud nato ang Davao City ba.