EDITORYAL – Sunog gipahimuslan

Ang mga lumolupyo sa Sitio Avocado, sakop sa Barangay Lahug, nga nasunogan sa ilang kabalayan kaniadtong Sabado, dili angay’ng mosupak sa reblocking sa ilang dapit nga gimando ni Acting Cebu City Mayor Edgardo Labella.

Sama sa dapit nga nasunogan sa Barangay Lorega-San Miguel nga gi-reblock sa City Hall, pwerteng nindota na sa pagka karon. Nahapsay na ug kumpleto na sa mga karsada ang dapit nga ilang gipuy-an nga sayon na lang kaayo alang sa mga hingtungdang lumolupyo.

Ang rason ngano nga ang mga bombero dugay kaayo nga nakapawong sa sunog nga miulbo sa Sitio Avocado mao ang kakuwang og access road paingon sa interior portion sa maong dapit.

Tungod sa kahakog og luna sa mga lumolupyo, nag-iyahay lang sila sa pagpadaku sa ilang kabalayan ug nakapahagip-ot sa agianan nga maglisod ka na gani pag-agi kun aduna kay dala.

Ang kadagkoan sa University of the Philippines (UP) dili usab angay nga mopahimulos sa higayon nga abi kay nasunog na ang maong dapit, dili na nila tugotan ang mga nasunogan sa pagtukod og balik sa ilang panimalay.

Sila maoy mabasol ngano nga ang dakong luna nga kabahin sa yuta nga gidonar kanila sa Kapitolyo kaniadto, gipuy-an sa mga squatters, kay wala man nila matagad aron magamit sa tunghaan.

Gani kun sabton pag-ayo, adunay rason ang Kapitolyo nga bawion ang maong luna kay anaa sa kasabotan nga kun dili magamit ang yuta nga ilang gidonar alang sa tunghaan, mahimo kini nga bawion.

Sa laktod, dili angay nga pahimuslan sa UP ang sunog aron dili na patukoron pagbalik og panimalay ang mga nasunogan.