Ang Solar Power (2)

Tingali ang Sinag-1 sa Puerto Prinsesa, maoy kinadak-ang ‘Solar Power project’, sa tibuok kalibutan. Aduna kini 25,000 ka ‘solar panels’, nga gimuntar kini sa luna nga may sukod 20 ektarya. Naghatag ni’g enerhiya’ng 6.67 megawatt nga kuryente, nga igo’ng makahatag suplay nga enerhiya sa tibuok siyudad.

Sa Luzon, Visayas ug Mindanao, daghan na sab ang nakamuntar og ‘solar power’, ilabi na sa mga kinahilitang dapit ug mga kaislahan, nga wala pa maabot sa serbisyo sa elektrisidad. Nga sa sama’ng higayon, nahatagan sab sila’g mga oportunidad nga molambo ang lugar, kay naa na man sila’y mga ‘solar power.’

Kaniadto, sa diha’ng una ni’ng gihingusgan sa mga nasud sama sa Germany, Japan ug USA, gumikan sa kamahal, nihit nimo kini igkita, gawas kun may igo’ng kwarta nga ika-order, makasugakod ka gayud sa dinagkong instalasyon niini.

Apan ang China nga nakasulod na sa negosyo sa kalibutan, ang produkto nila nga ‘ solar power technology’, misulbong’ pag-ayo ang demanda, gumikan kay portable’ng sayon imuntar nga di hasol gamiton. Gawas pa, naikag na ang mga yano o masang konsumidor, sa paggamit ini, kay medyo mainat na nila ang gasto o badyet segun sa ila’ng prayoridad nga panginahanglan – sa inerhiya.

Gidungog ang China sa kabarato sa ila’ng mga produkto, mao nga nanagana gihapon ang uban, basi’g di kapusla’g maayo kay menus ang kalidad ini o kaha kuyaw nga gamiton. Mahimo’ng tinuod ang pangagpas sa uban, apan ang ila’ng pagmenus sa presyo sa merkado, gitumo’ng aron daghan ang maengganyo sa paggamit sa ‘solar power’. Kun daku na unya ang demanda ini, momahal na sab.

Segun sa badyet, may kapilian ta’ng masarangan, kay naa kunohay nga ‘domestic quality’, barato ra, og kun gusto ka’g mahalon, ‘export quality’ ang pangitaa. Apan gilipat lang ta’s mga nagnegosyo, sa ila’ng gimik sa pagpresyo.