Si kanhi mayor Tomas R. Osmeña mipasaka na usab og laing 20 ka kaso nga administratiba batok ni Cebu City Treasurer Diwa Cuevas.
Miabot na sa 32 ka kaso ang giatubang ni Cuevas didto sa Civil Service Commission, walay labot sa laing 28 ka kasong administratiba nga atua gipasaka ni Osmeña sa Department of Finance.
Ang baruganan ni Osmeña ngano nga gipasakaan niya’g reklamo si Cuevas mao ang mga “adverse opinion” sa Commission on Audit nga daghan og kalapasan nga nahimo sa dakbayan sa Sugbo sa state audit procedures.
Nakapangutana si Cuevas kun ngano nga siya ra man ang gikiha ni Osmeña ug wala man iapil ang city accountant nga si Atty. Mark Rossel Salomon?
Gitataw ni Cuevas nga ang iyang partisipasyon sa mao nga mga transaksyon nga gikuwestyon sa COA mao ra g’yud ang pagbayad kay ang city accountant miaprobar man nga legal na kini nga bayaran.
Husto ang baruganan ni city treasurer Cuevas nga angay’ng iapil ni kanhi mayor Osmeña pagpasaka og kaso ang city accountant kay mao kini ang mimatuod nga legal ang pagbayad sa mao nga mga transaksyon.
Sa mga Local Government Units (LGU), sama sa dakbayan sa Sugbo, ang City Accounting Office maoy una nga mohashas sa mga dukomento aron sutaon kun kompleto ba ang mga papeles ingon man tukma ba ang pundo sa kuwarta nga adto kuhaon ang bayad.
Husto usab si Osmeña nga kadtong mga opisyal ug kawani sa City Hall nga adunay unliquidated cash advances, angay gayud nga pasakaan og kaso. Dili hinuon kini trabaho ni Cuevas lang, kun dili, trabaho usab kini sa City Legal Office. Apan motrabaho ba gud sila kun walay order sa mayor?