Bata gusto nga kuhaon gikan sa custody sa inahan

Dear Atty. Divine,

Duna ko’y anak nga 4-anyos na karon, ug dili kami kasal sa amahan sa bata apan ang amahan nagsustento sa bata pinaagi sa iyang mga ginikanan. Karon, ang amahan mihulga kanako nga iyang kuhaon ang bata ug sila na kuno ang mopaeskwela ug sila na ang mo-custody sa bata. Wala ko mosugot sa ilang gi-demand kanako. Matud sa amahan nga iyang ihunong ang pagsustento kun dili nako ihatag ang bata kaniya. Unsa may maayo nako nga buhaton? Kinsa man gyud namong duha ang adunay katungod sa bata? Daghang  salamat. — Janice

Dear Janice,

Kun ang imong anak illegitimate, ikaw isip inahan maoy adunay katungod nga mo-custody sa bata base sa Article 176 of the Family Code of the Philippines nga nagkanayon; “Illegitimate children shall use the surname and shall be under the parental authority of their mother, and shall be entitled to support in conformity with this Code (Family Code of the Philippines).”

Gilatid usab sa maong balaod nga ang bata adunay katungod nga modawat og sustento sa amahan, busa obligado gyud ang amahan sa bata nga mosuporta kaniya. Ang maayo nimong buhaton, imong sultian ang amahan nga dili gyud nimo ihatag kaniya ang custody sa bata. Kun mohunong siya sa pagsustento, mahimo ka nga mopasaka og kaso batok sa amahan didto sa korte aron ang hukmanan na ang momando kaniya sa paghatag og suporta sa bata. Thanks and God Bless.-  Atty. Divine

Alang sa inyong pangutana may kalabutan sa problemang  legal, ipadala lang sa Legal Corner sa Banat News sa V. Gullas St., Cebu City or email sa [email protected]  ug akong tubagon ang inyong pangutana pinaagi sa akong column matag Miyerkules, Sabado ug Domingo.