All roads lead to the cemetery ugmang adlawa, Nobiyembre 1. Kinaiya na gyud natong mga Pinoy ang pagbisita sa lubnganan sa atong mga minahal sa kinabuhi nga mitaliwan na.
Bisan tinuod og sa petsa 2 pa sa Nobiyembre ang adlaw sa mga kalag, apan daghan kanato ang mobisita og sayo diha sa mga sam-ang.
Kay manglakaw man ang hapit tanan ug basin wala nay ibilin sa panimalay, unta inyong sundon ang pipila ka pahimangno aron sa inyong pagbalik ang inyong mga balay wala mabiktima sa kawatan ug sa sunog.
1.) Siguroa og ibot ang tanang gipangsaksak nga mga appliances nga wala gamita. Mas maayo gani og pawngon tanang appliances ug walay ibilin nga nag-andar ug palungon ang plangka.
2.) Isirado usab ang LPG valve. Kun ugaling dunay hungaw, dili magpuot kay nakasirado man ang regulator. Mas labing maayo og ilisan daan ang hose kun inyong namatikdan nga duna kini hungaw aron masiguro gyud nga walay delikado.
3.) Daghan baya kanato ang magdagkot og kandila sa panimalay para pud lagi unta sa mga kalag nga libudsuroy. Pagnga gyud kini sa inyong pagbiya.
4.) Apan mas labing maayo gyud kun dunay mabilin nga tawo sa atong panimalay aron makalikay sab kita sa kawatan. Sigoroa gyud nga na-lock ang mga pultahan.
Pipila lang kini ka mga sugyot aron hingpit nga luwas ang atong panimalay sa sunog ug sa pag-atake sa mga kawatan.
Mas maayo man nga sa atong pagbiya o pagbakasyon, makasalig kita nga luwas ang atong panimalay sa kadaot nga mamugna unya sa sunog.
Sa makausa pa, unta magmalinawon ug hapsay ang atong paghandom sa Adlaw sa mga Santos ug sa mga Kalag. Happy Halloween!