Karong adlaw nga Domingo ug Lunes, handumon nato ang adlaw sa mga Santos ug sa mga Kalag sa atong mga mahal sa kinabuhi nga mitaliwan na sa laing kalibutan.
Excited na kaayo ang atong kaigsuonan nga mopauli sa tagsa-tagsa nila ka mga probinsya aron moduaw ug modagkot og kandila sa mga sam-ang diin gipahiluna ang ilang mga mahal sa kinabuhi.
Apan daghan ang nasagmuyo tungod kay wala man ideklarar sa Malacañang nga holiday ang Nobiyembre 2, adlaw nga Lunes, diin mao g’yud unta ang adlaw nga pagtimaan sa mga patay o ang gitawag nga “Kalag-Kalag.”
Kadto’ng manguli sa mga lagyo nga dapit igo na lang g’yud mosimhot sa mga sam-ang aron makabalik dayon ilabi na kadtong may mga trabaho nga gibiyaan.
Dili man tungod lang sa kapretso sa pagbakasyon ang tumong sa pagpamauli sa mga probinsya kay secondary o bonus na man lang unta ka na.
Apan ang tim-os nga tinguha mao man gyud ang paghandum sa mga mitaliwan atol sa adlaw sa mga minatay ngadto sa mga sam-ang.
Apan mahulog na man hinuon og mahilaw ang atong pagpakig-uban sa mga mahal sa kinahuhi nga mitaliwan bisan man lang sa atong presensya ug pag- ampo ngadto sa mga sam-ang.
Salikwaot kaayo paminawon nga makigkompetensiya ang trabaho sa mga tawo sa adlaw nga angay unta nga igahin alang sa paghandum sa mga nangamatay.
Makausa ra man unta kini sa usa ka tuig ngano nga wala na man lang gyud hatagi og importansya ni PNoy ang Nobiyembre 2, bisan na man lang tungod ug alang sa iyang amahan ug inahan nga mitaliwan na sa laing kalibutan.
Maayo unta og labtikan sa mga kalag ang iyang dunggan!