“Dunay nag-operate nga video karera diri sa among lugar sa Sitio Camansi ug Sitio Lawis. Unta maapil ni og sumpo kay daghan na nga mga bata nga nabuang ani.”
Brgy Basdiot, Moalboal, Cebu
“Nagtipun-og man ang mga basura nga malata sama sa mga dahon ug uban pa diri sa among lugar. Mga duha na ka buwan nga wala ni makuha.“
Brgy Catarman, Liloan, Cebu
“Hangtud karon ang drainage diri sa Purok Sambag wala pa man g’yud atimana. Sige na’g follow-up ang among purok leader niini nga problema pero hangtud karon wala g’yud aksyoni.”
Brgy Tubigan, Compostela, Cebu
“Ang karsada namo diri wala pa g’yud mahuman pag-semento nga unta may budget na man para niini nga project. Nanggimaw na ang mga bato sa karsada mao nga maglisod ang mga sakyanan pag-agi, labi na sa mga motor.”
Brgy Linao, Talisay City
“Among ireklamo ning traffic light sa among lugar kay daghan na kaayong mga motorista nadakpan kay dili maklaro tungod sa kalayo. Gihimo ning problemaha sa ubang traffic enforcers sa ilang pangwarta.”
Brgy Mandilikit, Argao, Cebu
“Bati kaayo ang karsada dapit sa spillway, kuyaw sa mangagi nga mga sakyanan. Unta matagad na kining problemaha kay daghan na kaayo ang miangal.”
Brgy Kalunasan, Cebu City
“Ireklamo namo kining bati kaayo nga karsada sa Green Valley patungas sa OPPRA kay wala gyud ni atimana. Daghan na kaayo nga nagmotor nga natuwad niini’ng lugara tungod sa dagkong bangag sa karsada.”
Brgy Pusok, Lapu-Lapu City
“Dunay mga polis ug tanod nga sige’g pangayo’g kuwarta diri sa peryahan sa Matumbo, hapit kada gabii ni nila buhaton. Dili uroy kini sila mauwaw, bisan og daghang tawo nga makakita sa paghatag sa kwarta ug magsakay pa gyud sila sa ilang patrol car inig kobra.”
Brgy Centro, Mandaue City
“Tinuod gyud na nga daghan na kaayo’ng mga bata nga manguot sa mga tawo diri sa merkado. Naa man gani empleyado sa City Hall nga nakuotan sa mga bata nga sige’g hingos og vulcaseal ug rugby.”
Brgy Opao, Mandaue City
“Moreklamo mi nga taga Sitio Grancena kay ang mga basura mura na’g bukid kadaghan kay wala may klaro nga pagkuha, baho na kaayo.”
Brgy Liburon, Carcar City
“Mohangyo lang mi sa nagreklamo bahin sa dalan nga lisud agian sa mga sakyanan kay gubaon nga ibutang nila kun hain nga sitio mahimutang kay aron maaksyonan dayon sa barangay. Salamat kaayo nga naay nagpakabana sa mga problema.”
Alang sa inyong mga reklamo text lang sa 09062973166