Ang atong emosyon

Ang emosyon mao ang mopatandog sa pagbati sa atong pagkatawo. Di nato kini hingpit mahulagway kun unsa kini kagamhanan sa atong kinabuhi. Gisangkap kini sa kahitas-an kanato nga may kagawasan, nga kini aduna'y daku'ng kalabotan sa paglig-on sa atong pagkatawo. Kinahanglan maampingan kini nga mabalanse, nga dili maapektohan ang kahimsog sa panglawas.

Sagad wa kaayo ni kahatagi og pagmatngon, gisalig lang sa pamahala, nga wala matun-i ang sangputan kun kini makadaut ra sab diay sa kaugalingon. Kuyaw kini nga dili nato makontrol ang emosyon, kay maghatag kini'g daku'ng maldisyon, nga sagad atong gipapatuyangan hangtud naulipon kita sa emosyon. Lisud na kita kalingkawas sa gahum ini nga nadaut ang maayong panghunahuna.

Ang makapahimsog sa emosyon, mao ra gayud ang pagbalanse nga kanunay magkasinabtanay nga itugyan aninawon sa panghunahuna ang atong gibati. Aron makakab-ot og produktibo nga desisyon nga mopalambo sa kaugalingon. Apan kun ang lawas maluyahon, delikado usab kini nga ang emosyon maoy mopasamot nga atakehon sa hayblad o  kasingkasing nga motapos sa paglaum.

Busa, gikinahanglan gayud ang katibuk-an sa panglawas maoy una'ng palig-onon nga mohimsog. Kay kini mao sab ang naglangkob sa kalihokan sa lawas maingon man ang emosyon ug panghunahuna. Nga nagtimon sa kalamboan sa kinabuhi nga kabubut-on nato kini'ng gipili, nga nakaandam sa sangputanan.

Tungod ini, kun buot kitang matigayon sa hustong pagtimon padung sa rumbo nga kapuslan ang maayo'ng kinabuhi, may panahon pa nga atong bag-ohon ang husto'ng pagdala sa emosyon nga katimbang ang panghunahuna. Ug kun kini, di sab nato matagad ang kabililhon ini, wa ta'y kapaingnan o kapilian gawas nga sa hilabihan, ang imong emosyon maugtas sa grabe nga pagmahay.