Sa usa ka press conference, gipangutana ko sa reporter kun unsa’y kalainan nila ni Vice Mayor Edgardo Labella sa Team Rama ug ni Konsehal Nestor Archival, ang kandidato sa Bando Osmeña Pundok-Kauswagan (BOPK) alang sa pagka bise mayor dinhi sa dakbayan sa Sugbo.
Dinhi, makita gayud nimo ang klaro nga kalainan sa duha ka line-up. Ang Team Rama daghan kaayo og mga abogado. Apan mga maayo ba gud sila nga abogado?
Kuhai og base ang kontrobersiya sa Supplemental Budget No. 1. Ang Team Rama nga gipangulohan sa mga abogado, sila si Mike Rama, Edgar Labella, Joel Daluz, Hanz Abella ug Gerry Carillo misuway pag-amendar sa ordinansa pinaagi lang sa usa ka resolusyon.
Diha magsugod ang dako’ng kaguliyang sa isyu. Nakadungog ba kamo nga ang Kongreso miamendar og balaod pinaagi sa usa ka resolusyon?
Karon, ang tibuok Cebu City Council gipasakaan og kaso tungod sa pamaagi nga giduso nila ni Labella ug kaubanan. Dili lang kay maisip nga kuwestyonable apan ilegal g’yud ug makaapektar kini paggasto sa P16 Bilyones nga halin sa 45 ka hektareyas nga kayutaan sa SRP.
Tan-awa, ang Team Rama mipasa sa pagbasol ngadto sa mga sakop sa BOPK nga nahimo tungod sa ilang palpak. Kun ang maong mga abogado sa Team Rama makamao pa, gihimoan unta nila og kausaban ang ordinansa, nga usa ka balaod, pinaagi sa pagpahigayon og public hearing ug ipublikar ang pinirmahan nga kausaban dili kay ipaagi lang sa singko minutos nga pagdiskutir sa isyu atol sa sesyon.
Kinsa kaha ang makasulti ni Labella nga sayop g’yud ang ilang gihimo sa pag-usab sa ordinansa pinaagi lang sa resolusyon? Kun wala pa sila mohimo og mga pagpanglaktud, malikayan unta kining mao nga kontrobersiya karon.