Kataw-anan, “ksp” o kulang sa pansin, dunay gamay, nuisance ug uban pa nga negatibo nga paghulagway ang gihilam-os sa tanan nga mga tawo nga nagpatugatuga paglansar sa puwesto alang sa 2016 elections bisan pa man og sila ra ang nakaila sa ilang kaugalingon. Gitawag sila nga mga "wail" kon wala ilhi sa katilingban.
Sa unang adlaw pa lang gani sa filing sa Certificate of Candidacy niadtong Lunes, dili momenos 20 ka presidential hopefuls ang miduso sa ilang kandidatora uban sa damgo nga mahimong presidente sa nasud.
Seguro alang sa kadaghanan, gasamok-samok lang kining mga tawhana, apan kinsa man kita nga mohukom kun si kinsa ang angayan ug haum nga modagan sa gitinguha nga puwesto sa kagamhanan?
Labing seguro, adunay lig-on nga rason nga nagtukmod kanila pagduso sa ilang kandidatora. Wala man sila’y bili sa mata sa uban nga miisip kanila nga sama sa iro nga nagpaghot sa buwan, apan alang kanila, balido ang ilang gihimo gumikan sa dako nga kadismaya sa atong mga namunoan sukad kaniadto ug hangtod karon.
Kini tungod kay wala man sila makasulbad sa mga dagku nga suliran nga giantos sa katawhan. Kun atong itandi kining mga tawhana sa mga nabiktima sa krimen, sila ang wala na makaantos nga gusto nga mokumkom sa balaod aron makab-ot ang hustisya sa kalisod nga ilang nahiaguman.
Basin baya og kining mga kandidatoha ang mas adunay "K" katungod kay sa uban nga personalidad nga hilabihan ka popular sa pagka "K" kawatan sa buhis sa katawhan.
Hangtud nga dili makorehean ang bulok nga sistema sa nasud, magpadayon usab kining mga tawhana nga modagsa sa COMELEC panahon sa eleksyon aron mo-apply sa pagka presidente sa nasud.
I-reject man sila sa COMELEC, mobalik gihapon sila sa pamasin nga bisan man lang sa ilang "wild imagination" makaeskapo sila sa ngitngit nga reyalidad nga ilang gipuy-an human napalong ang nahabilin nila nga paglaum nga molambo ang yuta nga natawhan.