Misulbong si Mar Roxas

Karon nga klaro na nga si Leni Robredo ang ika-tandem ni Mar Roxas, nagkakusog ang posisyon sa Liberal Party, samtang nagkahanap ang ubang kampo.

Taliwala sa kalipay sa kampo ni Roxas nga mi-top kini sa UP survey, ang iyang popularidad nagtungas usab taliwala sa pagkanaog sa rating nilang Senador Grace Poe ug Bise Presidente Jejomar Binay. Nagsaka hinuon ang kang Mayor Digong Duterte.

Apan sa dihang gidawat ni Leni ang hagit nga mag-bise presidente, adunay mga alyado sa Nationalist People’s Coalition nilang Poe ug Chiz Escudero nga didto sa tigum sa LP aron ipahibalo ni Leni ang iyang pag-apil sa eleksyon sa 2016.

Nagkakusog usab sa social media ang mga propaganda ni Roxas sama sa iyang pagpangamahan sa call center industry dinhi sa nasud ug ang Cheaper Medicine Law.

Ang mga kolumnista ug komentarista sa kauluhan kanunay’ng nagbalikbalik sa makinarya nga maoy magdala kang Roxas sa kadaogan. Dungan kini sa hanap nga tinubdan sa pundo alang sa kampanya ni Grace ug Chiz.

Kun mapilde si Grace, wala siya’y laing basulon gawas ni Chiz, kay si Chiz man ang interesadong modagan si Grace aron gamiton niya pagpasaka sa iyang popularidad.

Ang laraw ni Senador Bongbong Marcos nga mag-bise presidente subidahon kaayo kay daghan pa’ng buhi nga biktima sa human rights sa martial law.

* * *

Sa nagsingabot pa ang unang adlaw sa pagsang-at sa sertipiko de kandidatura, daghang estorya nga mikatap kabahin sa kamada sa politika dinhi sa lalawigan sa Sugbo tali sa kampo ni Gobernador Junjun Davide ug sa posible niyang makaatbang nga si kanhi GSIS president Winston Garcia, igsuon ni kanhi gobernador ug karon Kongresista Gwendolyn Garcia.

Usa na niini ang pag-imbitar sa kapin 40 ka mayor nga anaa na sa Liberal Party ni Davide sa birthday sa amahan ni Winston nga si Noy Pabling didto sa usa ka kan-anan ug gipang-aporan og tag-P50,000.

Sa kapin P2 milyones nga gipanghatag ni Winston ngadto sa mga mayor niadtong gabhiona, unsa kaha’y bayad niini?

Kun magpahinayhinay si Davide, basin og magmata ra unya siya og buntag. Gikuyawan ko nga basin og sa atubangan ra nag-LP kining mga mayora, apan sa talikod nagkangkang na diay para kang Winston.

Aduna hinuoy kampo nga wala na makauyon sa kampo ni Davide ug nagpaklarong mitapon na g’yud sila sa grupo ni Winston. Kini ang mga Ouano sa Mandaue.

Ilang gisalikway ang tabi-tabi nga nanggawas nga ang LP sa Manila mikonsiderar ni Lolypop Ouano-Dizon para mayor sa Mandaue ug si Luigi Quisumbing patiwason sa iyang termino pagka-kongresista.

Si Bokal Teddy Ouano mismo nagkanayon nga dili kini tinuod ug klaro na nga adto sila mosuporta kang Winston ug dili sa manok sa LP.

Mokapin sa upat ka dekada na human gideklarar ni kanhi Presidente Ferdinand Marcos ang balaod militar nga nagbilin og dako nga uwat sa kasaysayan sa Pilipinas gumikan sa nahiagoman sa katawhang Pilipinhon gikan sa kamot nga puthaw.

Apan ang kangitngit sa martial law napulihan sa kahayag sa paglaum human hingpit nahagba ang rehimeng militar nunot sa pagkapukan sa dektadoriyang Marcos niadtong 1986, diin nabanhaw usab ang demokrasya sa paglingkod ni kanhi Presidente Corazon Aquino.

Sa pagpanglabay sa panahon, ang gipalayas ug gisuka sa mga Filipino nga bansagon inanay nga gilamoy ug gitulon ra usab pagbalik. Ang kanhi First Lady Imelda Marcos ug ang mga anak nga sila Imee ug Bongbong pulos naluklok sa katungdanan sa kagamhanan.

Niadtong adlaw’ng Sabado opisyal na nga gipahibawo ni Senador Bongbong Marcos ang tinguha nga magpapili pagka bise presidente sa umaabot 2016 elections.

Suportado si Bongbong ni kanhi Presidente Joseph Estrada kinsa napalagpot usab kaniadto sa katungdanan gumikan sa daghan nga mga kontrobersiya nga naglakip sa halapad nga pagpangawkaw.

Kun buligan sa kapalaran nga mapili nga bise presidente si Bongbong, mahimo nga usa na lang ka tikang unya alang sa mga Marcos ang pagbalik sa Palasyo sa Malacañang diin sila gipalayas kaniadto sa nag-alintabo nga kapungot sa mga Filipino nga nabiktima sa martial law.

Sa pagtuyok karon sa panghitabo, hingpit na ba nga nalimtan sa katawhang Pilipinhon ang madulom nga yugto sa kasaysayan sa martial law? Napasaylo na kaha sa mga Filipino ang bansagon nga gitunglo kaniadto tungod sa ilang pagkadiktador?

Kining mga pangutana mahatagan og hingpit nga tubag sa resulta unya sa 2016 elections.