Mikalit og anhi silang Senador Grace Poe ug Chiz Escudero ug miduaw sa lugar ni kanhi Kongresista Ace Durano sa Danao.
Nanguyab sila sa mga Sugboanon, ang samang mga Sugboanon nga gihilakan ni Grace human sa 2004 eleksiyon ug iyang ginganlan nga mga “tikasan” kay ngano kuno nga napilde ang iyang amahan nga si Fernando Poe Jr.
Dili na katingad-an pa ang paghilakhilak ni Grace ug ang iyang gipasanginlang mga tikasan, karon iyang panguyaban sa iyang boto. Nagpakita naman siya sa iyang pagkatrapo kon traditional politician.
Ang mga Durano lunod-patay karong nagsuporta sa kandidatura ni Mar Roxas, busa wala’y makatuo nga mobali sila ngadto sa grupo ni Grace.
Apan, usa ka kasaligang tinubdan nagkanayon nga si Ace mismo ang mi-text ngadto kang Roxas aron ipahibalo nga iya lang gidawat si Chiz “for old-time sake” nga buot ipasabot, tungod lang sa ilang panagbarkada, dili tungod kay suportado nila ang panagpares nilang Grace.
Sila si Ace ug Chiz kauban sa naila kaniadtong “The Spice Boys” sa Kongreso, uban nilang Gibo Teodoro, Prospero Pichay, Mike Defensor, ug Migz Zubiri.
Kun mao kini, pamasin ra pud diay nilang Grace ug Chiz nga mosuporta kanila ang mga Durano?
Usa pa, hanap pa man nga makadagan sa 2016 si Grace. Kun modesisyon na ang Senate Electoral Tribunal sa iyang citizenship, dako kini og epekto sa iyang plano sa 2016.
Hinuon, dili man g’yud orihinal nga plano ni Grace ang mag-presidente. Kay kun wala pa lang si Chiz sa iyang luyo nga magsige og hulhog nga dili mokuyog sa LP, hayan dugay ra kining misugot nga mag-bise ni Mar.
* * *
Kaluoy sa mga titser sa Mandaue, magpabiling P700 ang ilang “cost of living allowance” kon COLA kay ang resolusyon ni Konsehal Lollipop Ouano-Dizon nga usbawan kini aron mahimong P1,000, gibabagan sa pito ka konsehal sa Mandaue nga alyado ni Mayor Jonas Cortes.
Kamo nga mga titser sa Mandaue, wala kamo’y laing kahapakan sa inyong pagmahay gawas sa mga konsehal nga sila si Jun Cortes, Tony Dabon, Editha Cabahug, Jimmy Lumapas, JP Ceniza ug Nenita Layese. Ngano nga nakaingon ko nga kaluoy sa mga titser sa Mandaue? Kay ang mga titser sa Lapu-Lapu ubos sa administrasyon ni Mayor Paz Radaza nahimo na nga P1,500 ang ilang COLA.
Sa interbyu sa DyLA, si Jun Cortes miesplikar nga gibabagan nila ang resolusyon ni Lollipop kay gituki na sa School Board nga dili mahimo nga kuhaon sa Special Education Fund ang usbaw sa COLA sa mga magtutudlo.
Sumala pa nga ang usbaw, dili kuhaon sa SEF kon dili magdepende sa “availability of funds.” Kun gipamolitika nila ang COLA sa mga magtutudlo, kuyaw hinuon sila mapanimaslan.