Dear Atty. Divine,
Nagtrabaho ko sa usa ka kompaniya sulod sa lima ka tuig. Apan niadtong miaging buwan, mi-resign ko kay mi-apply ko og laing kompaniya nga mas dako og sweldo ug mas maayo’g benepisyo. Ila unta ko nga gipugngan apan wa g’yud ko magpapugong kay dili na man g’yud makaigo ang akong sweldo kay aduna ko’y duha ka tinun-an sa kolehiyo. Pagbiya nako sa kompaniya ila ko nga gisultian nga i-follow up lang ang akong last pay og 13th month pay. Kapin na sa usa ka buwan ko nga nagsige og follow-up apan hangtud karon wala pa man i-release ug matud sa taga accounting nga wala pa g’yud mapirmahi ang cheke. Ang akong pangutana, pila man g’yud diay ka adlaw or semana ang gibutang sa balaod una i-release ang last pay ug 13th month pay sa empleyado nga mi-resign? Unsa may maayo nako nga buhaton? — Jessa
Dear Jessa,
Kun wala ka’y utang sa imong previous company nga gitrabahoan, then wa’y rason nga ilang langayon ang pag-release sa imong last pay ug 13th month pay. Ang atong balaod wala maglatid kun pila ka adlaw g’yud gikan sa pag-resign una i-release ang last pay apan kasagaran sa mga kompaniya inigbiya sa empleyado ila man ihatag ang last pay. Kanang ilang pagpugong sa imong katapusang sweldo sulod na sa kapin sa buwan dili na sab kana makatarunganon. Ang maayo nimo nga buhaton mao ang pagpadala og final demand sa imong previous employer. Kun dili gihapon nila i-release, then imo sila nga pasakaan og reklamo ngadto sa NLRC. – Atty Divine
Alang sa inyong pangutana may kalabutan sa problema’ng legal, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules ug Domingo.