Wala pa gyud diay maundang ang kinawatay og container vans diha sa Cebu International Port. Niadtong miaging Septiyembre 7, nasakpan ang usa ka babaye nga Customs processor nga mipresentar og mga peke nga papeles aron ipagawas ang usa ka container van nga naka-consign pa gyud sa usa ka locator sa Mepza.
Maayo gani kay nasakpan ni Lt. Paul Oandasan, ang deputy chief sa Customs Police sa Bureau of Customs Port of Cebu. Ang kargamento’ng kawaton unta gideklarar nga office furnitures gikan sa China nga naka-consign sa Teletech Customer Care Management Philippines.
Apan gikataho nga may nakagawas na nga usa ka container van nga naka-consign sa Muramoto.
Wala pa gani masulbad ug wala pa ko kadungog og imbestigasyon sa kinawatay (swing operation) niadtong Hunyo, karon, migara na usab kini.
Giimbestigar dayon sa Customs si Maria Lavinia Monilar ug padayong giimbestigar karon ang giingong broker nga si Generoso Casempan sa Gaac Customs Brokerage.
Apan wala pa’y giimbestigar nga taga-Customs. Hangtud karon wala man gihapo’y seryoso nga imbestigasyon kalabot sa kinawatay og kargamento sa Customs?
* * *
Gipusdakan og warning ni Presidente Noynoy Aquino si Grace Poe pinaagi sa pag-ingon nga wala sila (sa Liberal Party) mahadlok sa unsa may desisyon niini sa 2016.
Dungan niini, si Kongresista Leni Robredo sige na’ng dayeg kang DILG Secretary Mar Roxas nga matud niya maayong tawo unya gihisgotan niini ang iyang kontribusyon sa call center industry sa nasud ug pangamahan sa balaod nga nagpabarato sa tambal.
Apan sa samang higayon, si Robredo miingon nga mas maayong si Poe g’yud ang mag-bise presidente ni Roxas.
Unsa kahay epekto sa warning ni Noynoy sa desisyon ni Poe nga iyang ipahibalo sa Septiyembre 16?
Si Duterte usab posible’ng mausab ang hunahuna, pero kuyaw kun siya ang ipares kang Roxas.
* * *
Gibalita sa usa ka pamantalaan ang landslide sa Villa Sebastiana sa Barangay Casili Mandaue nga kang kansang developer Aidfaz Development Corp gikatahong usa sa mga tag-iya ang pamilya ni Mayor Jonas Cortes.
Wala’y environmental compliance certificate sa DENR ang maong subdivision. Unsa? Subdivision sa Mandaue nga usa sa mga tag-iya ang mayor sa Mandaue, wala’y ECC?
Ayaw ko’g ingna nga gigamit lang diay ang gahum ni Jonas aron ma-develop ang subdivision?
Si City Administrator James Abadia miingon sa taho nga iyang imbestigahon ang insidente nga mikalas og kinabuhi sa usa ka bata. Unsa, iyang imbestigahon ang iyang mayor?
Ang maayong mo-imbestigar niini mao ang Ombudsman aron pagsusi sa pagpabaya sa kagamhanan sa Mandaue ug posible’ng paggamit sa gahum ni Jonas aron maproteksiyonan ang subdivision bisan sa mga violations niini.