Malingaw g’yud ko nga maminaw kun ang akong mga higala’ng komentarista maghisgot na sa mga isyu sa politika diha sa dakbayan sa Mandaue.
Ang gitan-aw gud karon nga mag-atbang pagpapili pagka mayor sa Mandaue mao man sila si Kongresista Luigi Quisumbing ug si Konsehal Lolypop Ouano-Dizon.
Tan-aw nako, dili g’yud ganahan ang mga tawo nga mobotar ni Luigi kun padayon siya nga magdumili sa paghatag og kwentada unsa’y gigastohan sa iyang P210 milyones nga “pork barrel” gikan sa kongreso sa tuig 2010 hangtud sa 2013.
Ang ngalan gud ni Luigi naapil man sa report sa Commission on Audit (COA) nga giingong adunay mga proyekto nga kwestyonable kay gitugyan ang salapi ngadto sa bogus nga mga foundations nga maoy mipatuman unta sa projects.
Banner headline gani kadto sa usa ka nasudnong mantalaan. Kini maoy angay nga tubagon ug ipasabot ni Luigi. Ang mga botante ra ba, kun dili lang madala og kuwarta, motan-aw g’yud sa mga kandidato nga tarong.
Ang nindot bitaw unta ni Luigi, imo nga ibutyag sa publiko kun unsa ang mga proyekto nga gigastohan sa imong P210 milyones nga PDAF gikan niadtong 2010 hangtud sa 2013. Unya gikan sa 2013 hangtud sa katapusan nimo nga nadawat.
Kun dili nimo kini mahimo Congressman Luigi, basin og mahisama ka ni Vice President Binay nga karon mura na og tawo nga sanglahon nga giyam-iran na sa katawhan.
Nakakita ka sa mga survey nga gihimo? Si Binay tua na sa labing iwit ug si Mar Roxas na ang misutoy sa ibabaw, dayon si Davao City Mayor Rodrigo Duterte, dayon Grace Poe.
Si Grace Poe nanaog ang iyang popularity rating kay ang mga tawo wala na ganahi kaniya tungod sa iyang pagka-ambisyosa nga gusto g’yud nga mahimong presidente bisan og kuwang pa og kasinatian pagdumala sa kagamhanan.
Dungog-dungog nga si Senador Chiz Escudero maoy himuon nga bise ni Grace Poe. Pastilan, mas maayo pa si Chiz kay may igo na nga kasinatian pagdumala sa kagamhanan.
Ang katawhan gusto g’yud unta kaayo ni Grace Poe kun mag bise presidente lang siya. Ang subra kaambisyosa dili g’yud maayo kay ikatandi kini nianang ubang tawo nga nangandoy og mga pwesto, ma publiko man o pribado, unya kusog manaot sa anaa sa puwesto kay gusto mopuli… pastilan.
Ambot unsay tumong ni Duterte nga sige man siya’g suroy-suroy unya kunohay magpadili-dili nga modagan pagka presidente. Padugang sa pusta?
Kun modagan si Duterte pagka presidente, tan-aw nako sila si Mar Roxas ang magtigi.