Posible g’yud nga ang sulod nga bahin niini’ng mga cylinder metal tanks nga gisudlan og “breathable air” (Oxygen) gipangtaya na ug imbes makatabang kini pagluwas sa mga pasyente nga naglisud sa pagginhawa, makamatay na hinuon.
Kay ang Oxygen gigamit man isip medical gas diha sa mga ospital, gibutang kini ubos sa pagkontrolar sa Food and Drugs Administration (FDA). Dili angay’ng magpaabot ang kadagkoan sa FDA nga may daghan nga mangamatay usa sila moaksyon.
Didto sa Dagupan City, dalagita nga nakasinati og hubak gigamitan og oxygen sa doktor sa usa ka ospital aron kuno makatabang nga siya dili na maglisud sa pagginhawa. Apan misamot na hinuon ang pag-ubo sa dalagita.
Diha nga gikuhaan og Chest X-Ray, nakita nga puwerte’ng daghana nga pino kaayo’ng taya diha sa iyang “lungs” kon baga. Namatay g’yud ang dalagita.
Aron pagsuta kun tinuod ba nga ang Oxygen maoy nakaingon, gigabas ug gibuak ang cylinder tank. Didto nakita nga puwerte’ng daghana diay’ng taya sa sulod sa tangke.
Sa ato pa, makahanggap man tuod og oxygen ang pasyente apan maapil ‘sab og hanggap ang taya. Kinahanglan nga mohimo na og pakisusi ang FDA niini aron dili magmahay kanila ang publiko.
Kinahanglan nga ang mga cylinder tanks nga hinimo lang sa ordinaryo nga puthaw, ilisan kini og mga tangke nga hinimo sa stainless aron nga dili tayaon.
Sa ingon nga paagi, malikayan nga ang pasyente imbes magpatambal aron maayo sa iyang sakit, mangamatay na hinuon.