Maayo ang pagkahiluna sa mga bisita sa Asia Pacific Economic Cooperation (APEC) Meet sa nagkadaiyang mga hotels ug mga resorts ug siguradong positibo ang ilang impresyon nganhi kanato. Apan bahala og si kinsay nagbayad sa ilang mga gastos, apan di unta pasagdan ang mga nag-atiman sa mga panginahanglan ug seguridad sa mga bisita.
Dunay budget sa ingon niini kadakong kalihokan apan makapahibulong kun nganong di man mapaigo sa tanang gi-deploy alang niining espesyal nga trabaho sama sa atong kapolisan.
Kung kinahanglan og daghang security personnel pangayo og dugang budget, apan kung way budget, nganong magpatugatuga man og hosts nga di man diay kaya? O basin ang problema naa sa PNP.
Makaluluoy tan-awon ang mga polis kay walay klarong katulganan ug bisan na gani sa ilang pagkaon P300 ray budget sa tibuok adlaw apan mura lang og pang-snacks ug duna pay mireklamong di halos makaon kay grabe kaayo kaubos ang kalidad. Asa na may propesyonalismo niini?
Sa katulganan pa lang, ang uban anaa lang naghanig sa bugnaw nga semento, dunay nagduyan sa bisan asang pasilidad sa gobiyerno diin sila gipahiluna. Way kwestyon kabahin sa kalig-on sa atong kapolisan kay sukad pa sa ilang pagka-aplikante nakaagwanta man sila niini aron makatrabaho ug makaserbisyo.
Apan hagbay ra man nangahuman ilang training, makatarunganon pa ba gihapon kini para kanila? Unsa na man lang kahay ikasulti sa ilang pamilya kun makita sila sa ilang sitwasyon?
Nganong paantuson man ang atong kapolisan? Ang mga opisyal hagok og katulog sa mabugnaw nga lawak ug lami ang gikaon apan diay 'to ang ilang mga sakop makaluluoy ang sitwasyon.
Kun ingon niini ang sistema, di kalikayang aduna g'yuy magbagulbol, madismaya, magduda nga dunay nangwarta sa budget. Kining hitaboa nahitabo na usab niadtong 2007 ASEAN Summit, apan hangtud karon wa gihapon nakat-on ang PNP kun unsaon.