Wa g’yud ko masayop sa akong pagtuo ug wa usab mamakak ang higala ko nga duwende nga si Mar Roxas gayud ang manok ni Presidente Aquino sa eleksyon karong 2016.
Kaniadtong Biyernes, giduso na gayud ni Presidente Aquino si DILG Secretary Mar Roxas nga maoy mosunod kaniya ug mopadayon sa nasugdan na niya nga programa alang sa tul-id nga dalan.
Matud ni PNoy nga tulo ang iyang gipilian, ug sa tulo si Mar Roxas ang naghupot sa labing taas nga integridad. Wala hinuon niya hinganli ang duha bisan tuod og nakahibawo na kita kinsa sila.
Kinsa man si Roxas nga gipili ni Presidente Aquino nga maoy mopuli kaniya sa Malakanyang aron maoy mopadayon sa iyang nasugdan na nga mga programa?
Siya mao si Manuel “Mar” Roxas, ang bana ni Korina Sanchez nga usa sa mga inila nga personalidad sa media. Apo siya ni kanhi presidente Manuel Roxas ug anak sa kanhi senador nga si Gerry Roxas.
Samtang nagsilbe nga kongresista sa Capiz sa Negros Occidental, gitudlo siya ni Presidente Erap Estrada nga Sekretaryo sa Department of Trade and Industry (DTI) diin siya misikat ug gitawag nga Mr. Palengke.
Kini tungod sa iyang pagsige og adto sa mga merkado aron mabantayan ang mga negosyante nga magpatuyang lang sa pagpataas sa prisyo sa ilang mga baligya.
Si Mar napili nga senador ug nahimo nga amahan sa mga Call Center Employees sa nasud human niya mapalabang ang balaod nga gitawag og “You Can Make It” nga maoy nagtanom ug nagpatubo sa Business Process Outsourcing sa Pilipinas nga nakamugna og liboan ka trabaho.
Gidumala karon ni Roxas ang Department of the Interior and Local Government (DILG). Siya pa ang nangamahan sa balaod nga nakapabarato sa presyo sa mga maintenance drugs.