Kun adunay gitagana nga tabang ang kagamhanan alang sa mga tawo nga nabiktima sa bagyo nga Yolanda kaniadtong 2013 apan hangtud karon wala gihapon ihatag kanila maisip kini nga daku’ng inhustisya.
Mao kini ang nahitabo ngadto sa ubay-ubay’ng pamilya sa amihanang kalungsoran sa Sugbo, ug bisan na tingali sa uban nga dapit sa nasud, nga karon padayong nagpaabot nga madawat na nila ang tabang.
Dili imposible nga misulod ang pamolitika sa ubang opisyal niini nga aron kadtong mga dili nila kaalyado, dili malakip sa mahatagan og tabang bisan pa man og haum unta kaayo sila nga tabangan sa kagamhanan.
Pagkaluoy huna-hunaon nga hangtud karon, dul-an sa duha ka tuig na ang milabay sukad mahitabo ang bagyo’ng Yolanda, apan daghang mga pamilya ang wala pa gayud kahatagi og tabang.
Adunay ubang mga pamilya nga atol sa bagyo guba kaayo ang ilang panimalay apan gideklarar lang nga “partial” ra ang kadaot nga ilang nahiagoman.
Samtang adunay uban nga pamilya kang kansang kabalayan gamay ra ang nasinati nga kadaot apan nahatagan sila og tabang nga katumbas sa madawat niadto’ng nawad-an g’yud og kabalayan.
Tungod niini nga mga reklamo, ilabi na diha sa mga dapit nga grabe kaayo ang politika sama sa lungsod sa Daanbantayan, angay g’yud tingali nga ang Department of Social Welfare and Development (DSWD) mao ang moasikaso aron patas ang paghatag og tabang.
Ang usa ka nindot nga proyekto sa kagamhanan dili magmalampuson kun kini abusohan lang sa ubang politiko nga magpili kun kinsa sa ilang kaalyado ang hatagan.