Dear Atty. Divine,
Usa ako ka magtutudlo sa pribado’ng tunghaan ug 10 ka tuig na ako sa mao nga eskwelahan apan matag tuig ila gihapon kami papirmahon og kontrata. Nalatid sa contract nga kun moundang kami og tudlo sa tunga-tunga sa tuig, ila kami nga pabayron og P120 mil. Tag P11 mil ang among suweldo kada buwan ug gusto unta ko nga mobalhin sa public school apan maglisud man ko og bayad sa P120 mil nga ilang ipabayad kun mo-resign ko. Unsa may maayo nako nga buhaton? —Jean
Dear Jean,
Kun 10 years na ikaw nga nagtudlo sa maong tunghaan then makonsiderar ka na nga regular nga empleyado ug dili na angay nga papirmahon og kontrata matag tuig. Ang usa ka regular nga empleyado mahimo nga boluntaryo’ng mo-resign. Base sa balaod, kun ang empleyado mo-resign sa trabaho kinahanglan nga iyang pahibaw-on ang iyang employer within 30 days sa dili pa moepekto ang iyang resignation. Wala malatid sa balaod nga pabayron ang empleyado kun siya mo-resign busa way legal nga basehan kanang kontrata nga inyong gipirmahan ug mahimo ninyo kini nga kuwestyonon ngadto sa DOLE. Kun aduna kay kahigayonan nga makabalhin sa pagtudlo sa public school mas maayo nga mobalhin ka kay mas daku og suweldo ug husto usab ang mga benepisyo. Kun paninglan ka sa P120 mil sa imo nga pag-resign, then mahimo mo sila nga ireklamo sa dili makiangayon nila nga kontrata ug dili sila kapugos kanimo sa pagbayad sa maong kantidad. -Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_ divina @yahoo.com ug akong tubagon ang inyong pangutana pinaagi sa akong column.