Natandi sa mga Talisaynon ang agi sa pamunoan ni kanhi Mayor Eduardo “Eddiegul” Gullas ug karon Mayor Johnny V. de los Reyes (JVR). Dili malalis ug makita g’yud sa mga mata nga mas daghan og proyekto nga nahimo si Eddiegul sa siyudad sa Talisay kay sa administrasyon ni JVR.
Kini tungod kay gawas nga usa na ka tadhang Lolo sa politika si Eddiegul, may lig-on siya nga leadership ngadto sa iyang mga konsehal. Sagad sa mga proyekto nga giplano nga buhaton ni Eddiegul, suportado sa tanan niya nga konsehales, bisan ang mga kontra sa politika. Wala g’yuy mobaraw. Kun aduna man, diyotay ra ug molampus g’yud sa iyang tinguha.
In fairnes, daghan baya ‘sab og nahunahunaang proyekto si JVR. Apan pirme man kini nga harangan sa kauban niya’ng mga konsehal, kinsa usahay mounay pa niya’g saway.
Kun ngano’ng nahitabo kini, siya ug ang iya ra g’yud nga kaabag sa buhat ang makatubag. Tingali, gamay lang tune up ang kulang. It’s a matter on how you build a good leadership to your men, where at times you need their help for a good purpose, they can never say “No” but they heartily obey without any complaint.
Ang isyu sa bag-ong merkado sa Lagtang mao ra g’yuy hinungdan sa pagkapukan sa lig-ong kahoy sa politika. Gipilde si Eddiegul tungod kay nagtuo man ang mga tawo nga ang gibuhat ni Eddiegul makadaut sa ilang tuburan sa panginabuhian.
Wala nila makita nga ang gihimo ni Eddiegul was for a good change--para sa ilang kaayohan. Ang merkado sa Tabunok karaan na kaayo. Hugaw na, huot na ug subra na katrapik.
Angay lang nga ibalhin ang merkado og laing lugar. Angay lang nga himuon na kini nga moderno. Hunahunaa lang, kaniadto radyo ra g’yud ang source of information sa kahanginan, apan karon naa na’y internet, diin ultimo ang atong paryente o igsuon nga atua sa gawas, ato na nga mahikap.
Kinahanglan man g’yud nga mohimo ug modawat ta og change aron atong matagamtaman ang kusog nga paglambo nga dala niini. Ulahi na ni nga naamgohan sa mga Talisaynon, nga ang gibuhat ni Eddiegul para diay sa ilang kaayohan. Hinungdan, nga gimingaw na g’yud sila ni Eddiegul.