Husto ang gibuhat ni Presidente Benigno Aquino III nga wala mangayo og pasaylo ug niesplikar hinuon sa wala pa niya masulti sa kadaghanan kabahin sa nahitabo sa Mamasapano encounter.
Husto nga wala siya mangayo og pasaylo kay susama kini og ‘naghikog’ ang presidente. Si Aquino niesplikar sa iyang posisyon atubangan sa bag-ong nigradwar nga PNP-Academy Class 2015.
Kun si Senador Miriam Defensor Santiago pa maoy pasultihon, kun mangayo og pasaylo ang presidente nga sad-an siya, mag-abli kini sa bukal sa mga kaso nga mahimong ipasaka kaniya ini og kahuman sa iyang termino.
Maglisod g’yud si Aquino sa pagpasabot sa iyang posisyon kabahin sa nahitabo didto sa Mamasapano bisan makapila pa niya kini balik-balikon sa publiko.
Gani nigawas sa labing uwahing trust ratings sa Pulse Asia survey nga ikatulo nalang si Aquino sa mga opisyal sa gobiyerno nga makasalig ang mga Filipino.
Apan klaro kaayo ang gipasabot sa pangulo sa iyang eksplinasyon, wala niya gipadala ang mga polis didto alang sa usa ka suicide mission. Butang nga nahibawo g’yud ang tanan ug nakasabot niini.
Ang dako nga kasaypanan nga giangkon ni Aquino mao ang pagsalig niya sa mga tawong iyang gituohang mga propesyonal sa ilang trabaho.
Way kwestiyon sa kamaayong laki sa mga opisyal nga nalambigit sa maong operasyon, ang kwestiyon niini mao ang kredibilidad ug kamatinud-anon nila sa ilang trabaho.
Kadto lang wala pagpahibalo daan sa milingkod nga PNP Officer-In- Charge, kang Secretary Mar Roxas ug ngadto sa Armed Forces of the Philippines kabahin sa maong operasyon, niresulta sa kamatayon sa maong mga polis.
Leksyon kini nga angayang timan-an sa umaabot nga mga lider sa nasud.