Aduna pay daghan benepisyo ang neem tree apan dili na nato madetalye pa, apan bentaha na lang nga may mga ideya ta nga kini kapuslan gyud kun may gipamati sa lawas. Magtuon sab kita sa atong bation, ngano o kun unsa gyuy nakaingon o hinungdan niini, aron makalkulo ang tukmang mga paagi sa pagpreparar ini. Ato sab obserbahan kun unsa kadali kini moepekto kanato.
Ania ang dugang pang mga benepisyo sa neem tree, nga kinahanglan nga maobserbahan sad ang komplikadong mga sakit, kun unsa gyu’y pamaagi.
*MAKAHUPAY SA ARTRAYTIS – makatabang ni sa mga panakit tungod sa artraytis. Hupayon ang kangulngol nga makaugtas nga kasakit sa nanghuboy nga lutahan o kaugatan. Magpabukal og 1 ka tasang tubig unya ilunod ang 1 ka pudyot o hakop sa mga dahon, hangtud moluspad o mo-green ang tubig. Unya salaa ug pabugnawa, dayon imna sa dili pa mukaon sa pamahaw ug panihapon, sud sa 1 ka buwan.
*MAKAPAALIBYO SA KANSER – segun sa pagtuon niadtong 2014 sa mga ‘researchers’ sa Roswell Park Center Institute, nga ang pagkuhag duga o paglaga o pagdukdok sa dahon, buwak, bunga, ug liso, nakita nga duna kini katakos sa pag-alibyo, sama sa ‘chemo-preventive’ ug ‘anti-tumor’ sa tanang klase sa kanser, hasta ‘cervical’ ug ‘prostate’ cancer. Aduna ni ubang kemikal ‘components’ ug mga ‘antioxidants’ sa dahon nga makaayo sa kanser, pinaagi sa paglig-on usab sa sistima sa imyun, paghupay sa panakit, pag-alkontra sa mga dangan sud sa lawas (free radicals) ug pagpugong sa kadaut sa selyula.
Nota: Dili ni angay sa mga gagmay bata o masuso, nabdos, o nagpasuso.