“Dihadiha gipaadto si Jesus sa Espiritu Santo ngadto sa kamingawan. Nagpabilin siya didto og 40 ka adlaw ug gitintal siya ni Satanas .(Mk. 1;12-13)”
Atong hinumdoman nga ang tentasyon, dili usa ka sala kundili kahigayonan lamang sa pagpakasala. Tumong sa kaaway nga mao si Satanas nga mahisalaag ang tawo gikan sa hustong dalan ug agnihon niya ang tawo palayo sa Dios pinaagi sa pagpakasala sanglit ang sala, mao man ang makapahimulag sa tawo gikan sa Dios. Ang sala linugdangan sa usa ka pagpili. Kini nagpasabot nga anaa niini ang mga mosunod nga mga elemento:
Kahibalo (Knowledge) diin ang tawo nakahupot nang daan sa mga kinahanglanong impormasyon kalabot sa iyang pagahimoong lakang. Sama pananglit sa pagpatay. Ang pulong o buhat nga “Pagpatay” ang nakahupot nang daan og usa ka negatibong implikasyon. Dautan na kini daan. Kagawasan (Freedom) Mahimong likayan sa usa ka tawo ang paghimo sa maong sala. Apan bisan pa man kun anaa kaniya ang kagawasan sa paglikay, apan iya gihapon kining gihimo.
Kabubut-on (Will) nga sa ato pa, nagasukad ang maong paghimo gikan sa personal nga disposisyon gyud sa tawo nga iyang himoon ang maong kalapasan.
Kining tutulo ka mga elemento, maoy nakapahimo sa usa ka buhat ingon nga usa ka sala. Wala masakop niini ang mga tawong dunay suliran sa pangisip ug panghunahuna.
Ang pagpakasala adunay posibilidad nga mamahimong usa ka adiksiyon diin ang tawo nahimong nagapos sa naandan niyang sala nga kanunay niyang himoon (habitual sin). Nga sa ato pa, ang maong sala, maoy nakapahimo niyang ulipon sa gahom sa kangitngit.
Mao nga pari nga nakaalinggat sa dagan sa sugilanon sa biktima ang mahimong moampo sa pag-ampo alang sa kalingkawasan kay natataw man gyud kaayo nga adunay gahom espiritwal nga mas labaw pa kaysa tawhanong paningkamot nga nibilanggo ug niulipon sa biktima sa iyang naandang sala kun habitual sin.
Ang maong kaulipnan, nakaapekto dili lang sa personal nga kahimtang sa biktima kondili hasta na usab sa mga tawo o katilingban diin siya nalambigit.
Kusog ug gamhanan ang tentasyon kay pagaignon niini ang mga hamubong sentido (lower appetites) natong mga tawo.
Apan angay natong hinumduman nga walay bisan kinsa nga nahimong luwas ning maong pag-atake. Bisan gani, ang atong Ginoo ingon man ang mga santos ang nahiagom man sa ingon. Walay rason, kun nganong dili kita magmalampuson batok sa maong pakigbisog nga espirituhanon.
Implikasyon: Ayaw Ibutang ang imong Kaugalingon sa Kaalautan ug Kakuyaw. Kini ang positibong gamit sa: Pagkatalawan